މިސްކިތުގެ ޖަމާއަތުގައި ނަމާދުކުރާ ކޮންމެ ފަހަރަކު އަތަރު އުނގުޅާ ކައިރީގައި ތިބޭ މީހުންގެ ގައިގައިވެސް އަތަރު އުނގުޅާކަށް ނުޖެހޭކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
Advertisement
ރާއްޖެ މިސްކިތްތަކުގައި އަތަރު ފުޅި ބެހެއްޓުމާއި ނަމާދަށް ފަށަކުން އަތަރު ލުން ވަނީ ވަރަށް އާއްމުކަމަކަށް ވެފައެވެ.
މިކަމާއި ގުޅިގެން އިސްލާމިކް މިނިސްޓަރު ޑރ ޝަހީމް މީޑިއާތަކަަށް ފޮނުވި މެސެޖެއްގައި ވިދާޅުވީ ބައެއް މިސްކިތްތަކުގެ ތެރޭގައި ގިނަ އަދަދަކަށް އެކި ޒާތްޒާތުގެ އަތަރުފުޅިތައް ވެސް ބަހައްޓާފައި ހުންނަތަންވެސް ފެންނަކަމަށެވެ. އަދި ނަމާދަށް އަރަމުން އަތަރު އުގުޅާތަން ފެންނަކަމަށާއި މީ ސުންނަތުގައި އޮންނަ ގޮތްވެސް ނޫންކަމަށެވެ.
" ކޮންމެ ނަމާދަކަށް ސަފަށް އަރަންވީމާ އަތަރުލުމާއި ޖެހިގެން ހުރި މީހާގައިގައި ވެސް އަތަރު އުނގުޅުމާއި މިކަންކަމަކީ މިހާރަކަށް އައިސް ފެންނަކަންކަން . މިއީ ކޮންމެ ނަމާދަށް ފަށަން ސުންނަތުގައި އޮންނަ ކަމެއްނޫން." ޝަހީމް ވިދާޅުވިއެވެ.
މިނިސްޓަރު ވިދާޅުވަި ގެއިން މިސްކިތަށް ދާއިރު ސާފުތާހިރުވެގެން ދިއުމަކީ ސުންނަތެއްކަމަށެވެ. އެހެންނަމަވެސް ނަމާދުގެ ކުރިން ހުވަނދު ލާން އޮންނަނީ ދެ މަގާމެއްގައިކަމަށެވެ.
" އަޅުކަމުގެ ކުރިން ހުވަނދުލުން ސައްހަ ސުންނަތުން ސާބިތުވާ ދެ މަޤާމަކީ ހައްޖާއި އުމްރާއަށް އިހްރާމް ނިޔަތްގަތުމުގެ ކުރިންނާއި ހުކުރު ނަމާދަށް ދާއިރު. އެހެން ނޫނީ ވަކި އަޅުކަމަކާ ގުޅިގެން ކޮންމެ ފަހަރަކު އަތަރު ލުމެއް ނޯވޭ ސުންނަތުގަ. ނަމަވެސް ކޮންމެހެން ވަކި ވަގުތަކާ ނުގުޅުވައި ދިރިއުޅުމުގައި ސާފުތާހިރުވުމާއި ޒީނަތުގެ ގޮތުން ހުވަނދުލުމަކީ ސުންނަތެއް." ޝަހީމް ވިދާޅުވިއެވެ.
ފަހަކަށް އައިސް މިސްކިތުގައި ސުތުރާ ބަހައްޓާތީ އެތަކެތި ނަގަން އަންގާނެކަމަށް އިސްލާމިކް މިނިސްޓްރީން ބުނެއެވެ.
