ގިނަ އަދަދެއްގެ ދީނީ އިލްމުވެރިންތަކެއް އިިސްވެ އުފައްދާފައިވާ އަދާލަތު ޕާޓީގެ ރައީސްގެ އިންތިހާބު އޮންނާނީ މިމަހުގެ 31 ވަނަ ދުވަހު އެވެ. އެ އިންތިހާބުގައި އަދާލަތުގެ ރައީސްކަމަށް ވާދަކުރައްވަނީ ޑރ. އިކްރާމް އަބްދުއްސައްތާރު އިތުރުން އެ ޕާޓީގެ މިހާރުގެ ނައިބު ރައީސް ޝައިހު މުހައްމަދު ޝިފާން އެވެ.
އެ ވޯޓު ނެގުމަށް ހަމަޖެހިފައިވަނީ އިލެކްޓްރޯނިކް ވޯޓިން ނިޒާމެއް މެދުވެރިކޮށެވެ.
އަދާލަތު ޕާޓީގެ މިހާރުގެ ލީޑަޝިިޕުން މަކަރު ހަދާނެ ކަމަށް ތުހުމަތުކޮށް، އީ-ވޯޓިން ހުއްޓުވައި ދިނުމަށް އެދިވަޑައިގެން ރައީސްކަމަށް ކުރިމަތިލެއްވި ޑރ. އިކްރާމް ވަނީ ޕާޓީގެ އިތުރުން މައްސަލަ އިލެކްޝަންސް ކޮމިޝަން (އީސީ) ހުށައަޅާފައެވެ.
މިކަމާއި ގުޅިގެން އަދާލަތު ޕާޓީން މިއަދު އިކްރާމަށް ފޮނުވި ސިޓީއެއްގައި ބުނީ އިންތިހާބުގެ ކަންކަން ކުރިއަށް ގެންދަނީ ޕާޓީގެ ދުސްތޫރާއި އިންތިހާބަށް ހަދާފައިވާ ގަވައިދުތަކާ އެއްގޮތަށް ކަމަށެވެ. އެގޮތުން ޕާޓީގެ ގަވައިދު އޮތްގޮތުން ފޮށި ބަހައްޓައިގެން ވޯޓުލުން ކުރިއަށް ގެންދަން ޖާގަ ނުދޭ ކަމަށް ވެސް ސިޓީގައިވެއެވެ.
މީގެއިތުރުން އިންތިހާބު ކުރިއަށް ގެންދަނީ ދެފުށް ފެންނަ ގޮތަށް، މިނިވަން ކަމާއެކު ކަން ސިޓީގައި ފާހަގަކޮށް ޕާޓީގެ މެމްބަރުންގެ މެދުގައި އިންތިހާބާމެދު ޝައްކު އުފެދޭނެ ގޮތަށް ވާހަކަ ނުދެއްކުމަށްވެސް އިކްރާމަށް އެޑްރެސްކޮށް ފޮނުވާފައިވާ ސިޓީގައިވެއެވެ.
