ބޭންޑުން ވަކިވުމަށްފަހު އިނގިރޭސި ބަހުން ޝަހީދު ނެރުނު ބަޔާނެއްގައި ބުނެފައިވަނީ، މި އުނދަގޫ ނިންމުން ނިންމަން ޖެހުނީ ބޭންޑުގެ މާލީ ކަންކަން ހާމަކަން ބޮޑު ގޮތެއްގައި ކުރިއަށް ނުގެންދިއުމާއި، އެއްބަސްވެފައިވާ ގޮތަށް އުޖޫރަ ނުދިނުމުގެ ސަބަބުން ކަމަށެވެ.
ޝަހީދު ސިފަކުރި ގޮތުގައި ބޭންޑުގެ ހިންގުން ވަނީ އެންމެން ގުޅިގެން ކުރާ މަސައްކަތެއްގެ ބަދަލުގައި، އެކަކު ބޭނުންވާ ގޮތަށް ހިންގާ "ވަން މޭން ޝޯ" އަކަށް ބަދަލުވެފަ އެވެ. އަދި މިއުޒިކީ ދާއިރާގައި އޭނާ ހޭދަކުރި 25 އަހަރުގެ ތަޖުރިބާއަށް އެއްވެސް ގަދަރެއް ނުވަތަ އިހުތިރާމެއް ނުބެހެއްޓުމަކީ އެންމެ ބޮޑަށް މާޔޫސްވި ކަންތައް ކަމަށް އޭނާ ފާހަގަކުރި އެވެ.
މި ހުރިހާ ދަތިތަކަކާ އެކުވެސް، "ޓޫ އޮފް އަސް" އާއެކު އިންޑިއާގެ ރިއަލިޓީ ޝޯ "ބެޓުލް އޮފް ބޭންޑްސް އިންޓަނޭޝަނަލް" ގައި ބައިވެރިވެ، ރާއްޖެއަށް ރީތި ނަން ހޯދައިދެވުނުކަން ޝަހީދު ވަނީ ފަހުރުވެރިކަމާއެކު ފާހަގަކޮށްފަ އެވެ.
ޝަހީދުގެ އިތުރުން، އެ ބޭންޑުގެ ލީޑް ވޯކަލިސްޓް ނަސޫހު ވެސް ވަނީ މިދިޔަ އަހަރު މެދުތެރޭގައި ބޭންޑުން ވަކިވެފަ އެވެ. އޭރުވެސް އަޑުފެތުރުނު ގޮތުގައި ނަސޫހު ވަކިވީ ބޭންޑުގެ މެމްބަރުންގެ މެދުގައި އޮންނަ އިހުތިރާމް ކުޑަވުމާ ގުޅޭ މައްސަލަތަކެއްގަ އެވެ.
