މި ހިތާމަވެރި ހާދިސާގައި މަރުވެފައިވަނީ އުމުރުން އެންމެ 11 މަހުގެ ފިރިހެން ކުއްޖެކެވެ.
މި ހާދިސާ ހިނގާފައިވަނީ އެމެރިކާގެ ނިއު މެކްސިކޯގައެވެ. ދަރިފުޅުގެ މަންމަ، ޑެލީ އެ ކުއްޖާ ގޮވައިގެން ފިލައިގެން އުޅޭތާ ފަސް ހަފުތާ ވެފައިވަނިކޮށް ފުލުހުންނަށް އެ މީހުން ފެނުނީ އެ ސަރަހައްދުގެ "އާރްވީ ޕާކެއް" ގައި ތިއްބައެވެ. ފުލުހުން އެތަނަށް ދިއުމުން، ޑެލީ ވަނީ ކުއްޖާ ގޮވައިގެން އާރްވީއެއްގެ ތެރެއަށް ވަދެ ފިލާފައެވެ.
ފުލުހުން އޭނާއާ ވާހަކަދައްކައިގެން ނެރެން މަސައްކަތް ކުރަމުން ދަނިކޮށް، އެތެރެއިން ބަޑިޖަހާ އަޑު އިވުނު ކަމަށް ރިޕޯޓުތައް ބުނެއެވެ. އަޑު އިވުމާއެކު ފުލުހުން ގަދަކަމުން އެތަނަށް ވަތްއިރު، ތުއްތު ދަރިފުޅުގެ ބޮލަށް ބަޑިޖަހައި ވަނީ މަރާލާފައެވެ. އެވަގުތު ޑެލީ ހުރީ އަމިއްލަ ބޮލަށް ބަޑި ދިއްކޮށްގެން ކަމަށާއި، ނަމަވެސް ފުލުހުން ވަނީ ހުޝިޔާރުކަމާއެކު އޭނާގެ އަތުން ބަޑި އަތުލައި ހައްޔަރުކޮށްފައެވެ.
މި މައްސަލައިގައި ޑެލީގެ މައްޗަށް މިހާރު ވަނީ ގަސްތުގައި މީހަކު މެރުމުގެ ދައުވާ އާއި ކުޑަކުއްޖަކަށް އަނިޔާކުރުމުގެ ދައުވާ އުފުލާފައެވެ. އަދި އޭނާ މިހާރު ހުރީ ފުލުހުންގެ ބެލުމުގެ ދަށުގައެވެ.
