ދިވެހި ސަރުކާރުން ނެރުނު ބަޔާނުގައި ބުނެފައިވަނީ، އިސްތިއުމާރުކޮށްފައިވާ އިރުމަތީ ގުދުސްގެ ޝައިޚް ޖައްރާހް ސަރަހައްދުގައި ހުންނަ އުންރުވާގެ އިމާރާތްތަކަށް އަމާޒުކޮށް ސަހުޔޫނީން ދިން މި ހަމަލާއަކީ ބައިނަލްއަގުވާމީ ގާނޫނުތަކާއި އުސޫލުތަކާ ކަނޑައެޅިގެން ހިލާފު އަމަލެއް ކަމަށެވެ.
އަދި މީގެ ސަބަބުން ފަލަސްތީނުގެ ރައްޔިތުން ތަހައްމަލު ކުރަމުންދާ ނިކަމެތި އިންސާނީ ހާލަތު އިތުރަށް ގޯސްވެގެންދާނެ ކަމަށް ފޮރިން މިނިސްޓްރީން ނެރުނު ބަޔާނުގައިވެ އެވެ. މީގެ އިތުރުން، މިއީ ބައިނަލްއަގުވާމީ އަދުލުގެ ކޯޓު (އައިސީޖޭ)އިން ނެރެފައިވާ އަމުރުތަކާވެސް ކަނޑައެޅިގެން ހިލާފު އަމަލެއް ކަމަށް ބުންޏެވެ.
އަންރުވާއިން ފަލަސްތީނަށް ތާއީދުކުރާ ކަމަށް ބުނެ ސަހުޔޫނީން ވަނީ މީގެ ކުރިން ފާޑުކިޔާފައެވެ. އަދި އަންރުވާގެ އިމާރާތްތައް ތަޅާލުމަކީ ގާނޫނާ އެއްގޮތްވާ ގޮތުގެ މަތިން ކޮށްފައިވާ ކަމެއް ކަމަށް ސަހުޔޫނީން ވަނީ ބުނެފަ އެވެ.
އުންރުވާ އުވާލުމަށް މީގެ ކުރިން ވެސް ސަހުޔޫނީން މަސައްކަތްކޮށްފައިވާއިރު އުންރުވާއަކީ ޓެރަރިސްޓް ޖަމާއަތެއްކަމަށް ހެދުމަށް އެމެރިކާ ސަކާރުން ވެސް މަސައްކަތް ކޮށްފައި ވެއެވެ.
