މިއީ ލިބޭ މުސާރަ ކުޑަވުމަށްވުރެ ބޮޑަށް، ފައިސާ މެނޭޖްކުރުމުގައި ގެންގުޅެވޭ ނުރަނގަޅު އާދަތަކުގެ ސަބަބުން ދިމާވާ ކަމެކެވެ. ދިރިއުޅުމުގެ ވައްޓަފާޅިއަށް ކުދިކުދި ބަދަލުތަކެއް ގެނެސްގެން، ލިބޭ އެއްޗަކުން ދެކޮޅު ޖައްސައި ފައިސާ ރައްކާކުރެވިދާނެއެވެ.
މާލީ ކަންކަން ރާވާނެ ގޮތުގެ މާހިރުން ލަފާދެއްވަނީ "50/30/20" ގެ އުސޫލު ގެންގުޅުމަށެވެ. މީގެ މާނައަކީ ލިބޭ މުސާރައިގެ 50 ޕަސަންޓު ޒަރޫރީ ކަންކަމަށް (ކުލި، ކަރަންޓު ބިލް، ކާބޯތަކެތި) ހާއްސަކުރުމެވެ. އަދި 30 ޕަސަންޓު އަމިއްލަ އެދުންތަކަށް (ކޮފީ، ރެސްޓޯރެންޓް، އަންނައުނު) ބޭނުންކުރާއިރު، ބާކީ 20 ޕަސަންޓު ރައްކާކުރުމަށް ނުވަތަ ދަރަނި ދެއްކުމަށް ވަކިކުރުމެވެ. މުސާރަ ލިބޭ ދުވަހު މިގޮތަށް ބަހާލުމުން، ބޭކާރު ހަރަދުތައް ކުޑަކުރަން ފަސޭހަވާނެއެވެ.
ބޭރުން ކެއުމުގެ ބަދަލުގައި ގޭގައި ކައްކައިގެން ކެއުމަށް އިސްކަންދިނުމަކީ ވެސް ފައިސާ ރައްކާކުރެވޭނެ އެންމެ ފަސޭހަ އެއް ގޮތެވެ. އޮފީހަށް ދާއިރު ގެއިން ކާއެއްޗެހި ގެންދިއުމާއި، ފެން ފުޅި ގެންދިއުން ފަދަ އާދަތަކުން މަސް ނިމޭއިރު ޖީބަށް ލުއިވާކަން އިހުސާސް ކުރެވޭނެއެވެ. އަދި ބާޒާރުކުރަން ދާއިރު ލިސްޓެއް ހަދައިގެން ދިއުމާއި، ބަނޑުހައިވެފައި ހުންނަ ގަޑިތަކުގައި ބާޒާރުކުރަން ނުދިއުމަށް ސަމާލުވާށެވެ. ބަނޑުހައިވެފައި ހުންނައިރު ބޭނުންނުވާ އެތައް އެއްޗެއް ގަނެވޭ ގޮތް މެދުވެރިވެއެވެ.
ފައިސާ ރައްކާކުރުމުގައި އެންމެ މުހިންމު ކަމަކީ "ޕޭ ޔުއާސެލްފް ފަސްޓް" އުސޫލު ގެންގުޅުމެވެ. މީގެ މާނައަކީ ހަރަދުކޮށްފައި ބާކީވާ އެއްޗެއް ރައްކާކުރުމުގެ ބަދަލުގައި، މުސާރަ ލިބޭއިރަށް ފުރަތަމަ ކަމަކަށް ރައްކާކުރަން ކަނޑައަޅާފައިވާ އަދަދު އެހެން އެކައުންޓަކަށް ޖަމާކުރުމެވެ. މުއްސަނދިވުމަކީ ގިނައިން ފައިސާ ލިބުމެއް ނޫނެވެ. އެއީ ލިބޭ އެއްޗެއް ރަނގަޅަށް ބޭނުންކުރަން އެނގުމެވެ.
