މި މަހުގެ 22 ވަނަ ދުވަހު ބްލަޑް ސާވިސްއިން ވަނީ ހަ ގްރޫޕެއްގެ ލޭ މަދުވެގެން ލޭ ހަދިޔާ ކުރުމަށް އެދިފަ އެވެ. ލޭ ލިބުމަށް ދަތިތަކެއް ކުރިމަތިވެފައިވާއިރު ތެލެސީމިއާ ކުދިންގެ ވެސް ގިނަ ކަންބޮޑުވުންތަކެއް މިކަމުގައި އެބައޮތެވެ.
މަޖިލީހުގެ ގަވައިދުގެ ދަށުން މިނިސްޓަރަށް ސުވާލުތަކެއް ފޮނުވީ، ގަލޮޅު އުތުރު ދާއިރާގެ އެމްޑީޕީ މެންބަރު މުހައްމަދު އިބްރާހީމް (ކުޑޫ) އެވެ.
ނާޒިމްއާ ސުވާލުކުރުމަށް ކުޑޫ ހުށަހެޅުއްވީ ލޭ ދޭ މީހުންނާއި އެ މީހުންގެ ލޭގެ ގްރޫޕް ހިމެނޭ ގޮތަށް ތަފްސީލު ދަފްތަރެއް އަދިވެސް އެކުލަވާލެވިފައި ނުވަނީ ކީއްވެގެންތޯ ސާފުކުރުމަށާއި ލޭ ހޯދުމުގައި ދިމާވާ ދަތިތަކަށް ޒަމާނީ ހައްލެއް ހޯދިފައިނުވަނީ ކީއްވެގެންތޯ ސާފުކުރުމަށެވެ.
ބްލަޑް ސާވިސަސްއަށް ލޭ ހަދިޔާކުރުން އޮންނަނީ ކޮންމެ ހަފްތާއެއްގެ ވެސް އާދީއްތަ ދުވަހުން ފެށިގެން ބުރާސްފަތި ދުވަހުގެ ނިޔަލަށެވެ. އެގޮތުން ކޮންމެ ދުވަހެއްގެވެސް ހެނދުނު 8 އިން ރޭގަނޑު 8 އަށް ލޭ ހަދިޔާކުރެވޭ ގޮތަށް ވަނީ ހަމަޖެހިފަ އެވެ.
