ކުރިއަށް އޮތް ލޯކަލް ކައުންސިލް އިންތިހާބަށް އަމިއްލަ ގޮތުން ވާދަކުރާ ކެންޑިޑޭޓުންގެ ތާއީދު ފޯމު ފުރުމަށް ހަމައެކަނި އީފާސް ބޭނުންކުރާ މައްސަލައިގައި ކުރީގެ ހޯމް މިނިސްޓަރު ކަންބޮޑުވުން ފާޅުކުރެއްވިއިރު، ކުރީގެ ރައީސް އަބްދުالله ޔާމީން އަބްދުލްގައްޔޫމް އިލެކްޝަންސްއާ ދެކޮޅަށް ދައުވާ އުފުލަން ނިންމައިފި އެވެ.
Advertisement
ޔާމީންގެ އިތުރުން ވެސް، ތާއީދު ފޯމު ފުރުމަށް ހަމައެކަނި އީފާސް ބޭނުންކުރާ މައްސަލައިގައި ކުރީގެ ހޯމް މިނިސްޓަރު، އުމަރު ނަސީރު ވެސް ވަނީ ކަންބޮޑުވުން ފާޅުކުރައްވައިފަ އެވެ.
އެ އުސޫލާ ގުޅޭ ގޮތުން ކަންބޮޑުވުން ފާޅުކުރައްވައި އުމަރު، އީސީގެ ރައީސް މުހައްމަދު ޒާހިދަށް މިއަދު ފޮނުއްވި ސިޓީއެއްގައި ވަނީ، އަމިއްލަ ގޮތުން ވާދަކުރާ ކެންޑިޑޭޓުން ހޯދަން ޖެހޭ 50 ސޮއި ހޯދުމުގައި، އެ ސޮއި ދޭ މީހުން އެ މީހުން އަމިއްލައަށް އީފާސް މެދުވެރިކޮށް ލޮގިންކޮށްގެން ވެރިފައި ކުރަން ޖެހޭ ގޮތަށް ހަމަޖެއްސުމަކީ، އަމިއްލަ ގޮތުން ވާދަކުރާ ކެންޑިޑޭޓުންގެ އިންތިހާބީ ހައްގަށް އުނިކަން ލިބޭ ކަމެއް ކަމަށް ދެކޭ ކަމަށެވެ.
ރާއްޖޭގައި އީފަސް ބޭނުން ކުރަނީ އާބާދީގެ ވަރަށް މަދު ޕަސެންޓެއްގެ މީހުންކަން ފާހަގަ ކުރައްވަމުން އުމަރު ވިދާޅުވީ އީފާސް ބޭނުން ނުކުރާ މީހުންގެ ހައްގަށް އުނިކަން ލިބޭ ކަމަށެވެ." އުމަރުގެ ސިޓީގައި ވެއެވެ.
މީގެ އިތުރުން ޕީއެންއެފްއިން ރޭ ބޭއްވި ޖަލްސާގައި ޔާމީން ވިދާޅުވީ، ޓެކްނޮލޮޖީގެ ވަސީލަތްތަކަކީ ކިތާބީ ހެކި ނުވަތަ ޝަފަހީ ހެއްކަށް ބާރުދޭ ހެކި ނެތި ޝަރީއަތުގެ މަޖިލީހުގައި ވެސް ބަލައިގަންނަ އެއްޗެއް ނޫން ކަމަށެވެ.
ޔާމީން ވިދާޅުވީ ދިވެހިރާއްޖޭގެ ޝަރުއީ ކޯޓުތަކުގައި މިނިވަންކަމެއް ނެތް ކަމަށެވެ. އެހެންކަމުން އެ މައްސަލަ ކުރިއަށް ގެންދާނެ ކަމާމެދު ސުވާލު އުފައްދަވައި އެމަނިކުފާނު ވިދާޅުވީ ކޯޓުގައި އެ މައްސަލަ ކުރިއަށް ނުގެންދިޔަ ނަމަވެސް، ހަމައެކަނި އީފާސް ބޭނުންކުރަން ނިންމުމުގެ ގާނޫނީ ބާރު އިލެކްޝަންސްއަށް ލިބިގެން ނުވާކަން ރައްޔިތުން ގަބޫލު ކުރާނެ ކަމަށެވެ.
މީގެ އިތުރުން އިދިކޮޅު އެމްޑީޕީން ވެސް ވަނީ އިންތިހާބުގައި ވާދަކުރަން ފޯމު ހުށަހެޅުމުގައި ދަތިތައް ދިމާވާތީ މެނުއަލްކޮށް ވެސް ފޯމު ބަލައިގަންނަން ގޮވާލައިފަ އެވެ.
އިލެކްޝަންސް ކޮމިޝަންގެ އޮންލައިން ޕޯޓަލް މެދުވެރިކޮށް އިންތިހާބަށް ކުރިމަތިލުމަށް ހުޅުވާލީ މި މަހުގެ 17 ވަނަ ދުވަހު އެވެ.
އަންނަ އާދީއްތަ ދުވަހުގެ ދަންވަރު 12 ޖެހުމުގެ ނިޔަލަށް އެ ފުރުސަތު ހުޅުވާލާފައިވާއިރު، އެ އިންތިހާބަށް ކުރިމަތިލާން އެދޭ މީހުން ފޯމު ހުށަހަޅަން ޖެހެނީ އީސީގެ މައި ޕޯޓަލަށް އީފާސް މެދުވެރިކޮށް ލޮގިން ވެގެންނެވެ.
