ގިނަ ފަހަރަށް އަތުޖެހެނީ އަވަހަށް ތައްޔާރުކޮށްލެވޭ ނޫޑްލްސް، ޗިޕްސް ނުވަތަ ބިސްކޯދު ފަދަ ތަކެއްޗެވެ. ނަމަވެސް މިއީ ސިއްހީ ގޮތުން ބަލާއިރު އެންމެ ރަނގަޅު އާދައެއް ނޫނެވެ.
ރޭގަނޑު ލަސްވާ ވަރަކަށް އިންސާނާގެ ހަށިގަނޑުގެ މެޓަބޮލިޒަމް ނުވަތަ ކާތަކެތި ހަޖަމުކުރުމުގެ ބާރު ދަށްވެއެވެ. އެހެންކަމުން ދަންވަރު ގަޑީގައި ތެޔޮ ނުވަތަ ހަކުރު ގިނަ ކާނާ ކެއުމުން، އެ ތަކެތި ހަޖަމުނުވެ، ބަރުދަން އިތުރުވުމަށް މަގުފަހިވެއެވެ. އަދި ބަނޑު ފުރެންދެން މާ ގަދަޔަށް ކައިގެން އޮށޯތުމުން ނިދުމަށް އުނދަގޫވެ، މޭއަންދާ ގޮތް ވެސް ވެއެވެ.
އެހެންކަމުން ދަންވަރު ބަނޑުހައިވެއްޖެނަމަ ކާން އެންމެ ރަނގަޅު އެއް އެއްޗަކީ ޔޯގަޓެވެ. ހަކުރު ނުހުންނަ ޕްލެއިން ޔޯގަޓަކީ ބަނޑަށް ލުއި، އަދި ޕްރޮޓީން ލިބޭ އެއްޗެކެވެ. މީގެ ތެރެއަށް ކުޑަ މޭވާކޮޅެއް ނުވަތަ ބެރީސްކޮޅެއް އަޅާލައިގެން ކާލުމުން ބަނޑުހައިކަން ފިލުވައިދެއެވެ. ހަމައެއާއެކު، ދޮންކެޔޮ ވަކެއް ކާލުމަކީ ވެސް ރަނގަޅު ގޮތެކެވެ. ދޮންކޭލުގައި ހުންނަ މެގްނީޒިއަމް އާއި ޕޮޓޭސިއަމްގެ ސަބަބުން މަސްތައް ހަމަޖެހި، އަރާމުކޮށް ނިދުމަށް އެހީވެދެއެވެ.
ބަދަން ނުވަތަ އާމަންޑް ފަދަ "ނަޓްސް" ގެ ބާވަތްތަކަކީ ވެސް ދަންވަރު ކާލަން ރަނގަޅު އެއްޗެކެވެ. ނަމަވެސް ލޮނު ނުލާ ހުންނަ ބަދަން އިހުތިޔާރުކުރުމާއި، މާ ގިނައިން ނުކެއުމަށް ސަމާލުވާން ޖެހޭނެއެވެ. މީގެ އިތުރުން ނިދުމުގެ ކުރިން ހޫނު ކިރު ތަށްޓެއް ބޯލުމަކީ ޒަމާނުއްސުރެ ނިދަން ފަސޭހަކުރުމަށް ބޭނުންކުރާ އުކުޅެކެވެ.
ވީމާ، ދަންވަރު ބަނޑުހައިވެގެން ނުނިދިއްޖެނަމަ، ބަނޑުހައިހޫނުކަންމަތީގައި އޮތުމުގެ ބަދަލުގައި ނުވަތަ ސިއްހަތަށް ގެއްލުންވާ ފަދަ އެއްޗެއް ކެއުމުގެ ބަދަލުގައި، މިފަދަ ލުއި ކާނާއެއް އިހުތިޔާރުކުރާށެވެ. އޭރުން ބަނޑުހައިކަން ފިލައި، ހަށިގަނޑަށް ބުރަބޮޑުނުވެ އަރާމު ނިދރެއް ލިބޭނެއެވެ.
