ފަނޑިޔާރުންގެ މަހާސިންތާގެ މި އަހަރުގެ މައިގަނޑު މައުޟޫއަކީ، ޝަރުޢީ ދާއިރާގައި ޓެކްނޮލޮޖީއާއި އޭއައި ބޭނުންކުރުމެވެ.
މި އަހަރުގެ މަހާސިންތާގެ ކީ ނޯޓް ސްޕީކަރަކީ ޕްރޮފެސަރ ޑރ. ޙަސަން އުގެއިލްއެވެ. މީގެ އިތުރުން އިންޑިއާގެ ޖުޑީޝަލް އެކަޑަމީގެ ފެސިލިޓޭޓަރުންވެސް މަހާސިންތާގައި ބައިވެރިވެވަޑައިގަންނަވައެވެ.
ފަނޑިޔާރުންގެ މަހާސިންތާއަކީ، ޑިޕާޓްމެންޓް އޮފް ޖުޑީޝަލް އެޑްމިނިސްޓްރޭޝަންގެ ޖުޑީޝަލް އެކަޑަމީން އިންތިޒާމު ކޮށްގެން ކޮންމެ އަހަރަކުވެސް ކޯޓުތަކުގެ ހިންގުމުގެ ނިޒާމު ހަރުދަނާ ކުރުމަށް ބޭނުންވާ ޚިޔާލާއި މަޝްވަރާ ހޯދުމަށް ބާއްވަމުންދާ މަހާސިންތާއެކެވެ.
ދެދުވަހުގެ މުއްދަތަށް ވިލާ ނޯޓިކާ ރިސޯޓުގައި ކުރިއަށް ގެންދާ ފަނޑިޔާރުންގެ މަހާސިންތާ ފެށުމުގެ ރަސްމިއްޔާތުގެ ޝަރަފުވެރިކޮށްދެއްވީ، އުއްތަމަ ފަނޑިޔާރު އަބްދުލްޢަނީ މުޙައްމަދެވެ.
ފަނޑިޔާރުންގެ މަހާސިންތާގެ ފުރަތަމަ ދުވަހު ކުރިއަށް ގެންދިއުމަށް ހަމަޖެހިފައިވަނީ، ޝަރުޢީ ދާއިރާގައި އޭއައި އަދި ޓެކްނޮލޮޖީ ބޭނުން ކުރުމާއި ގުޅޭ ސެޝަންތަކެކެވެ. އަދި ދެވަނަ ދުވަހު މިދާއިރާއަށް ހުރި ގޮންޖެހުންތަކަށް ޙައްލެއް ގެނައުމާއި ގުޅޭ ސެޝަންތަކެއް ކުރިއަށް ގެންދާނެއެވެ.
މި ރަސްމިއްޔާތުގައި ޖުޑީޝަލްސް ސާރވިސް ކޮމިޝަންގެ ރައީސް ހުސްނީ މުބާރިކާއި، އެކޮމިޝަނުގެ މެންބަރުންނާއި، ރާއްޖޭގެ ކޯޓުތަކުގެ ފަނޑިޔާރުންނާއި، ސަރުކާރުގެ އިސް އޮފިޝަލުން ހިމެނޭޙެން ގިނަ ފަރާތްތަކުން ވަނީ ބައިވެރިވެ ވަޑައިގެންފައެވެ.
