ރައީސް މުހައްމަދު މުއިއްޒު އިއްޔެ ވަނީ މަދުވެގެން 100 މިލިއަން ޑޮލަރު އިންވެސްޓްކުރަން ޖެހޭ އިގުތިސޯދީ މަސައްކަތްތަކުގެ ލިސްޓަށް ބަދަލު ގެންނަވައިފަ އެވެ. އެއާ އެކު، އެ ލިސްޓުގައި ގޭސް އެކްސްޕްލޮރޭޝަންގެ މަސައްކަތްތަކާ އެކު ވަނީ ތެލާއި ގޭހާއި މިނެރަލް އެކްސްޕްލޮރޭޝަންގެ މަސައްކަތްތައް ހިމަނުއްވައިފަ އެވެ.
އެ ނިންމެވުމާ މެދު ކަންބޮޑުވުން ފާޅުކުރައްވައި ޝައުނާ މިއަދު އެކްސްގައި ވިދާޅުވީ، ރާއްޖޭގެ ކަނޑު އަޑިން މައިނިންގެ މަސައްކަތާއި ތެޔޮ ހޯދުމަށް މަގުފަހިވާ ގޮތަށް ގާނޫނީ ގޮތުން ބާރުދިނުމަކީ ކަންބޮޑުވުމެއް ކަމަށެވެ.
އެ ކަމުގެ ސަބަބުން، ފަތުރުވެރިކަމަށް ނޭދެވޭ އަސަރުކޮށް، މަސް ކަނޑުތައް ހަލާކުވާނެ ކަމަށް އޭނާ ވިދާޅުވި އެވެ. މިއީ ރާއްޖޭގެ ކަނޑުއަޑީގެ ދިރުންތަކަށް އޮތް ނުރައްކަލެއްކަމަށް ޝައުނާ ވިދާޅުވި އެވެ.
ރާއްޖޭން ތެޔޮ ފެނޭތޯ ބެލުމަށް ކުރީގެ ރައީސް އަބްދުﷲ ޔާމީންގެ ވެރިކަމުގައި ދިރާސާއެއް ކުރި ނަމަވެސް އެ މަސައްކަތް ކާމިޔާބުވެފައެއް ނުވެ އެވެ. އެހެން ނަމަވެސް ރާއްޖޭން މިނެރަލް އެއް ފެނޭތޯ މީގެ ކުރިން މަސައްކަތެއް ކުރިކަމެއް އެނގޭކަށް ނެތެވެ.
