މި މަޝްރޫއުގެ ބިންގާ އަޅުއްވާދެއްވީ އެކަމަށްޓަކައި ބޭއްވި ހާއްސަ ރަސްމިއްޔާތެއްގައި ރައީސް ޑރ. މުހައްމަދު މުއިއްޒު އެވެ.
މި މަޝްރޫއު ނިންމާލުމަށް އަމާޒު ހިފާފައިވަނީ 2028 ވަނަ އަހަރުގެ ނިޔަލަށެވެ. 790 މިލިޔަން އެމެރިކާ ޑޮލަރު ނުވަތަ 12.2 ބިލިޔަން ރުފިޔާ އިންވެސްޓްކޮށްގެން ނ. އަތޮޅުގައި ތަރައްގީކުރާ ޓައުންޝިޕް ވާނީ ޒަމާނުގެ ވަސީލަތްތަކާއި ސިފަތަކާއެކު އިންޑިއާ ކަނޑުގެ އިތުރަށް ދުނިޔޭގެ ފެންވަރުގައިވެސް ފާހަގަކުރެވޭ ތަފާތު މަޝްރޫއަކަށް ސަރުކާރުން ބުނެ އެވެ.
ސަރުކާރުން ބުނެފައި ވަނީ މަޝްރޫއު ނިމުމުން މިއީ ދުނިޔޭގެ ފެންވަރުގައި ފާހަގަ ކުރެވޭނެ ދެމެހެއްޓެނިވި ތަރައްގީގެ ނަމޫނާއަކަށް ވާނެ ކަމަށެވެ.
ސަސްޓެއިނަބުލް ޓައުުންޝިޕް "އައިލާ މޯލްޑިވްސް"ގެ އަމަލީ މަސައްކަތް ފެށުމުގެ ރަސްމިއްޔާތު - ފޮޓޯ: ރައީސް އޮފީސް
"އައިލާ ސަސްޓެއިނަބަލް ޓައުންޝިޕް" ގައި ލަގްޒަރީ ފެންވަރުގެ މެހެމާންދާރީގެ ހިދުމަތްތަކާއި ރެސިޑެންޝަލް ބައިތައް ހިމެނޭނެ އެވެ. މީގެ އިތުރުން މުހިންމު އިޖުތިމާއީ އަދި އިގްތިސާދީ ދާއިރާތައް ވެސް މި ޓައުންޝިޕްގައި ހިމެނެ އެވެ. އޭގެ ތެރޭގައި، ރާއްޖެ އަކީ މެޑިކަލް އަދި ވެލްނެސް ޓޫރިޒަމްގެ މައިގަނޑު މަންޒިލެއްގެ ގޮތުގައި ފާހަގަކުރާ، އެންމެ ޒަމާނީ މެޑިކަލް ފެސިލިޓީއަކާއި، ބައިނަލްއަގްވާމީ ފެންވަރުގެ ހޮސްޕިޓާލިޓީ އަދި ލީޑަޝިޕް ސްކޫލެއް ހިމެނެ އެވެ. އަދި ކާނާގެ ރައްކާތެރިކަން ހަރުދަނާކުރުމަށް އަމާޒުކޮށް ތަރައްގީކޮށް، ދަނޑުވެރިކަމާއި މަސްވެރިކަމުގެ ނިޒާމްތައް ހިންގާނެ ވަކި ރަށެއްވެސް ހިމެނެ އެވެ.
އެސްއީޒެޑްގެ ދަށުން ރާއްޖޭގައި ތަރައްގީކުރާ އެންމެ ފުރަތަމަ ސަސްޓެއިނަބަލް ޓައުންޝިޕް ޕްރޮޖެކްޓުގެ ބިންގާ އެޅުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން އިނކޮނޮމިކް މިނިސްޓަރު މުހައްމަދު ސައީދު ވިދާޅުވީ، އައިލާ މަޝްރޫޢަކީ ހަމައެކަނި ތަރައްގީގެ މަޝްރޫއެއް ނޫން ކަމަށާއި، މިއީ ރާއްޖޭގެ އިގުތިޞާދީ ކުރިއެރުމާއި ފަތުރުވެރިކަމާ މެދު އަލުން ވިސްނާލަން ލިބުނު ފުރުސަތެއް ކަމަށެވެ. އަދި ރާއްޖޭގެ ފަތުރުވެރިކަމަށް މުޅިން އާ ބާބެއް ހުޅުވައިދޭނެ މަޝްރޫއެއް ކަމަށް މިނިސްޓަރު ފާހަގަކުރެއްވި އެވެ.
މި މަޝްރޫއަކީ ހަމައެކަނި ރިސޯޓް ތަރައްގީކުރުމުގެ މަޝްރޫއެއް ނޫންކަން ފާހަގަކުރައްވަމުން ސައީދު ވިދާޅުވީ، މީގެ ސަބަބުން ރާއްޖެއަކީ ހަމައެކަނި ޗުއްޓީ ހޭދަކުރާ ތަނެއްގެ ބަދަލުގައި، ދިގު މުއްދަތަށް ދިރިއުޅޭ އަދި އިންވެސްޓްކުރާ މަންޒިލަކަށް ބަދަލުވެގެންދާނެ ކަމަށެވެ. މި މަޝްރޫއުގައި ހިމެނޭ މުހިންމު ބައިތަކަކީ:
މި މަޝްރޫއަށް ބޭނުންވާ ކަރަންޓުގެ މަދުވެގެން 60 ޕަސެންޓް އުފައްދާނީ އިޔާދަކުރަނިވި ހަކަތައިންނެވެ.
