އާންމުކޮށް ރާއްޖެއިން ފެންނަ އިންޑިއާގެ ޑްރާމާ ސްޓައިލް ނުވަތަ "ކަސޯޓީ" ވައްތަރުގެ ވާހަކަތަކާ ހިލާފަށް، މި ފިލްމަކީ ދިވެހިންގެ އަސްލު ދިރިއުޅުމާ ގުޅޭ އަމިއްލަވަންތަ އުފެއްދުމެއްކަން އާސިމް ފާހަގަކުރެއްވިއެވެ. މިއީ މިޒަމާނުގެ ޒުވާން ކުދިންތަކެއްގެ ހުނަރު ފެނިގެންދާ "ޖެންޒީ" ފިލްމެއް ކަމަށާއި، ފިލްމުގެ ރައިޓަރު އަދި ޑައިރެކްޓަރު މޯ އާއި މުޅި ޓެކްނިކަލް ޓީމުން ކޮށްފައިވާ މަސައްކަތްތައް ވަރަށް ފުރިހަމަ ކަމަށް އޭނާ ބުންޏެވެ.
މި ފިލްމުގައި ހަރަކާތްތެރިވާ ތަރިންގެ އެކްޓިންއަށް ބަލާއިރު، ލީޑު ރޯލުން ފެންނަ ލާނާ ޖަލީލްގެ ހުނަރު އާސިމް ވަކިން ހާއްސަކޮށް ފާހަގަކުރެއްވިއެވެ. އޭނާ ވިދާޅުވި ގޮތުގައި ލާނާ އެ ރޯލު އަދާކޮށްފައިވާލެއް ފުރިހަމަކަމުން، މުޅި އޯޑިއަންސް ފިލްމުގެ ތެރެއަށް ގެންގޮސް، މުޅި ސިނަމާ ހަމަހިމޭންކޮށްލުވިއެވެ. އަދި ފިލްމުގައި ދެން ހިމެނޭ ކެރެކްޓާތަކާއި، ހާއްސަކޮށް އާމިރާގެ ރޯލު ވެސް ވަރަށް "ރިއަލިސްޓިކް" ކަމަށް އާސިމް ވިދާޅުވިއެވެ.
މިއީ 18 އަހަރުން މަތީގެ މީހުންނަށް ހާއްސަ ފިލްމެއް ނަމަވެސް، މީގެން ދައްކުވައިދެނީ ގިނަ އާއިލާތަކެއްގައި ހިނގާ ހަގީގީ ހާދިސާތަކެކެވެ. އާސިމް ޔަގީންކަން ދިން ގޮތުގައި ބެލުންތެރިޔާގެ ދިރިއުޅުމުގެ ކޮންމެވެސް ހިސާބަކާ މި ފިލްމާ ގުޅުން ހުންނާނެއެވެ.
"ދޯދި" ޓީމަކީ މީގެ 5 އަހަރު ކުރިން އާސިމްގެ މިއުޒިކް ވީޑިއޯއެއްގައި ވެސް މަސައްކަތްކޮށްފައިވާ ޓީމެކެވެ. "ލޫދިފާ" އާއި "ނިވައިރޯޅި" ފަދަ މޮޅު ފިލްމުތަކުން ފެނިފައިވާ އާސިމް މިހާރު ބޮޑަށް ޝައުގުވެރިވަނީ ކެމެރާގެ ފުރަގަހުގައި ހުރެގެން ފިލްމު އުފެއްދުމަށެވެ. އެގޮތުން އޭނާ މިވަގުތު އަންނަނީ ޑައިރެކްޓަރު މޫމިން ފުއާދާއެކު "ޗާލާކީ" ވެބް ސީރީޒްގެ މަސައްކަތް ކުރަމުންނެވެ.
