އަދާލަތު ޕާޓީން މިރޭ ނެރުނު ބަޔާނެއްގައި ބުނީ އެ ޕާޓީގެ ހަތަރު ވަނަ ދައުރުގެ ރައީސަކު ހޮވަން މިއަދު ބޭއްވި އިންތިހާބުގެ ނަތީޖާ ދައްކާ ގޮތުން 99 ޕަސެންޓް ވޯޓާ އެކު ޝިފާން އެ އިންތިހާބު ކާމިޔާބު ކުރައްވާފައިވާ ކަމަށެވެ. ޕަސެންޓޭޖު އާއްމުކުރި ނަމަވެސް އެއީ ކިތައް ވޯޓު ކަމެއް އަދި ވޯޓުލީ މީހުންގެ ސީދާ އަދަދެއް އެ ޕާޓީން ހާމައެއް ނުކުރެ އެވެ.
އަދާލަތު ޕާޓީގެ ނައިބު ރައީސްގެ މަގާމުގައި މިހާރު ވެސް ހުންނެވި ޝިފާންގެ ރަނިންމޭޓަކީ ޝެއިހް އަބްދުﷲ ރަޝީދެވެ.
އިންތިހާބުގައި ލިބުނު ކާމިޔާބީއާ ގުޅިގެން ޝައިހު ޝިފާން ވަނީ އޭނާއަށް އިތުބާރުކުރައްވައި ވޯޓު ދެއްވި ހުރިހާ އެންމެންނަށް ޝުކުރު އަދާކުރައްވާފަ އެވެ.
އަދާލަތު ޕާޓީގެ ރައީސްކަމުގެ މަގާމުގައި އެންމެ ފަހުން ހުންނެވީ މިދިޔަ އެމްޑީޕީ ވެރިކަމުގައި ހޯމް މިނިސްޓަރަކަށް ހުންނެވި ޝެއިހު އިމްރާން އަބްދުالله އެވެ. އޭނާ ވަނީ އަދާލަތު ޕާޓީގެ ރައީސްކަން ދެ ދައުރު ކުރައްވާފަ އެވެ.
