މިއަހަރަށް ރައްޔިތުން މަޖލިސް ހުޅުވާދެއްވާ ރިޔާސީ ބަޔާނުގައި ރައީސް ޑރ މުހައްމަދު މުއިއްޒު ވިދާޅުވީ ދިވެހީންނަށް، ވަކިން ހާއްސަކޮށް ދިވެހި ޒުވާނުންނަށް، ވަޒީފާގެ ފުރުސަތުތައް އިތުރު ކުރުމަށް ކުރެވޭ މަސައްކަތުގެ ފުރިހަމަ ނަތީޖާ ނުކުންނާނީ، އަދި އޭގެ ދާއިމީ ހެޔޮ ބަދަލު ގައުމުގެ އިޤްތިސާދަށް ކުރާނީ ރާއްޖޭގައި ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލުކޮށްގެންކަމަށެވެ.
އެހެންކަމުން އެ މައްސަލަ ހައްލު ކުރުމަށް މި ސަރުކާރުން ފެށި "ކުރަނގި" އޮޕަރޭޝަންގައި މިހާތަނަށް 205,701 ބިދޭސީންގެ 10 އިނގިލީގެ ނިޝާނާއި ފޭޝަލް ރިކޮގްނިޝަނަށް ބޭނުންވާ ފޮޓޯ ހިމެނޭހެން ބައޯމެޓްރިކްސް ނަގައި އަޕްޑޭޓްކުރެވިފައިވާނެކަމަށް ރައީސް މުއިއްޒު ވިދާޅުވިއެވެ.
ބިދޭސީންގެ މައްސަލަ ހައްލުކުރުމަށް މި ސަރުކާރުން ހޯދި ކާމީޔާބޫގެ ވާހަކަ ދައްކަވަމުން ރައީސް މުއިއްޒު ވިދާޅުވީ މިދިޔަ ސަރުކާރުގެ ފަސް އަހަރުގެ ތެރޭގައި ފޮނުވާލެވުނީ އެންމެ 2649 ބިދޭސީންކަމަށެވެ. އެހެންނަމަވެސް މި ސަރުކާރު ވެރިކަމާއި ހަވާލުވި ފަހުން މިހާތަނަށް 11496 ބިދޭސީއެއް ފޮނުވާލާފައިވާނެކަމަށް ރައީސް މުއިއްޒު ވިދާޅުވިއެވެ.
ކުރަނގި އޮޕަރޭޝަންގެ 2ވަނަ ފިޔަވަހި ފަށާ މި ފިޔަވަހީގެ ދަށުން ކުރިއަށްގެންދިއުމަށް ހަމަޖެހިފައިވަނީ ބަޔޮމެޓްރިކްސް ދީ ނަމަވެސް ލީގަލައިޒް ނުވެ ތިބި ބިދޭސީން ލީގަލައިޒްކުރުންކަމަށް ރައީސް މުއިއްޒު ވިދާޅުވިއެވެ. އަދި މި މަސައްކަތްވެސް މިއަހަރުގެ ފުރަތަމަ ދުވަހުން ފެށިގެން ކުރަމުން އަންނަކަމަށްވެސް ރައީސް ވިދާޅުވިއެވެ.
ކުރަނގި އޮޕަރޭޝަން 2027 ވަނަ އަހަރުގެ މޭ މަހުގެ 2ވަނަ ދުވަހު ނިމޭއިރު ދިވެހިރާއްޖޭގައި ގަވާއިދާ ހިލާފަށް ބިދޭސީން އުޅޭނަމަ އެމީހުންގެ ސައްހަ އަދަދާއި އެއީ ކޮން ބައެއްކަން ކަށަވަރުކުރެވޭނެކަމަށް ރައީސް މުއިއްޒު ވިދާޅުވިއެވެ. އަދި ދިވެހިރާއްޖޭގައި ގަވާއިދާ ހިލާފަށް އުޅޭ ބިދޭސީންގެ މައްސަލައަށް އިތުބާރު ހުރި، ދާއިމީ ހައްލެއް ލިބިގެންދާނެކަމަށްވެސް ރައީސް މުއިއްޒު ވިދާޅުވިއެވެ.
