ދައުލަތުގެ މީޑިއާއާ ވާހަކަ ދައްކަވަމުން މިނިސްޓަރު ތޯރިގު ރޭ ވިދާޅުވީ ފަސިންޖަރުން ތިބުމަށް ކުރީގެ ޑޮމެސްޓިކް ޓާމިނަލްގެ ޑިޕާޗާ ހޯލް މަމަޖައްސައި، ވައިފައި ލިބޭނެ އިންތިޒާމު ވެސް އެމްއޭސީއެލް އިން ހަމަޖައްސާފައިވާ ކަމަށެވެ.
އިއްޔެ ވެސް ގިނަ ފްލައިޓް ކެންސަލްވެގެން ދިޔައިރު، އިނާ މޯލްޑިވްސްގެ ވެރިޔާ މުހައްމަދު ފިރާގު "އެކްސް"ގައި ކުރި ޕޯސްޓެއްގައި ވިދާޅުވީ، މިއަދު ވީއައިއޭއަށް 14 ފްލައިޓެއް ކެންސަލް ކުރާނެ ކަމަށާއި އެކަމުން އެނގިގެން ދަނީ މިހާރު މެދުއިރުމަތީގައި ހިނގަމުންދާ އަސްކަރީ ކުރިމަތިލުމަކީ ނާޒުކު، އަދި ރާއްޖެއަށް އެކަމުން ވަރަށް އަވަހަށް އަސަރު ކުރާނެ ކަމެއް ކަމަށެވެ.
މިހާރުގެ ހާލަތާ ގުޅިގެން ފަތުރުވެރިން އެއާޕޯޓަށް ދިޔުމުގެ ކުރިން ފްލައިޓަށް އަންނަ ބަދަލުތައް ރިސޯޓުތަކާއި ގެސްޓުހައުސްތަކުން ބެލުމަށް ޓޫރިޒަމް މިނިސްޓްރީން ވަނީ އިލްތިމާސްކޮށްފަ އެވެ.
މެދުއިރުމަތީގެ މަސްރަހު ހޫނުވެ، އެ ސަރަހައްދުގެ ގައުމުތަކުގެ ވައިގެ ސަރަހައްދު ބަންދުވުމާއި ގުޅިގެން، އެ ސަރަހައްދުގެ ތެރެއިން ދުނިޔޭގެ އެކި ކަންކޮޅުތަކާއި ގުޅި ލާމެހިފައިވާ ބައިނަލްއަގުވާމީ ދަތުރުފަތުރުގެ ނިޒާމަށް ވަނީ ބުރުއަރާފަ އެވެ.
މި ހާލަތާއި ގުޅިގެން ރާއްޖޭގެ ފަތުރުވެރިކަމުގެ ސިނާއަތުގެ އެއް ހިއްސާދާރު މާޓާޓޯ އިން ނެރުނު ބަޔާނުގައި، ސަރަހައްދީ ގޮތުން މަސްރަހު ހޫނުވުމާއި ގުޅިގެން ފްލައިޓްތައް ކެންސަލްވެ، އޮޕަރޭޝަނަލް ގޮންޖެހުންތަކާއި ކުރިމަތިވަމުންދާ ކަމަށް ބުނިއެވެ.
