އެކްސްގައި މިރޭ އެމަނިކުފާނު ކުރެއްވި ޕޯސްޓެއްގައި ވިދާޅުވީ ހާމަނާއީ އަވަހާރަކޮށްލި ކޮށްލުން އިހުލާސްތެރި މުސްލިމެއްގެ ހައިިސިއްޔަތުން ކުށްވެރިކުރައްވާ ކަމަށެވެ.
ހާމަނާއީ އަވަހާރަކޮށްލީ އެމެރިކާ އާއި އިޒްރޭލުން ގުޅިގެން ހޮނިހިރުދުވަހު އީރާނަށް ދޭން ފެށި ވަރުގަދަ ވައިގެ ހަމަލާތަކުގައި އެމަނިކުފާނުގެ އޮފީހަށް އަމާޒުކޮށްދިން ހަމަލާއެއްގަ އެވެ. އުމުރުން 86 އަހަރުފުޅުގައި ހާމަނާއީ އަވަހާރަވިއިރު، އެދުވަހުގެ ހަމަލާއިން ޒަހަމުވެވަޑައިގެން ފަރުވާ ހޯއްދަވަމުން ދަނިކޮށް، ހާމަނާއީގެ އަނބިކަނބަލުން ވެސް ވަނީ އަވަހާރަވެފަ އެވެ.
ހާމަނާއީގެ 14 މަހުގެ ކާފަ ދަރިކަލުން ހިމެނޭހެން އާއިލާގެ އެހެން ބައެއް ބޭފުޅުން ވެސް އަވަހާރަވި އެވެ.
ހާމަނާއީ އަވަހާރަކޮށްލި ކޮށްލުން މައުމޫން ކުށްވެރިކުރައްވާފައިވާއިރު، މި ވަގުތާ ހަމައަށް ވެސް އެކަމާ ގުޅިގެން ދިވެހިރާއްޖޭގެ ސަރުކާރުން އަދި ރައީސް މުހައްމަދު މުއިއްޒު އެއްވެސް އެއްޗެއް ވިދާޅުވެފައެއް ނުވެ އެވެ. އެކަމާ ގުޅިގެން ސަރުކާރަށާއި ރައީސް މުއިއްޒުއަށް ވަނީ ގިނަ ބައެއްގެ ފާޑުކިޔުން އަމާޒުވެފަ އެވެ.
އީރާންގެ އެންމެ އިސް ލީޑަރަކީ އެ ގައުމުގެ އަސްކަރިއްޔާގެ އެންމެ އިސްވެރިޔާ ވެސް މެ އެވެ. އަދި ގައުމުގެ ބޮޑެތި ކަންކަމުގައި ފަހު ބަސް ބުނާ ފަރާތަކީ ވެސް އެއީ އެވެ.
އެމެރިކާ އާއި އިޒްރޭލު ގުޅިގެން އިރާނަށް ދިން ހަމަލާތަކުގެ ރައްދުގައި އިރާނުން އަންނަނީ އިޒްރޭލާއި، އެމެރިކާގެ އަސްކަރީ މަރުކަޒުތައް ހުންނަ މެދުއިރުމަތީގެ ބައެއް ގައުމުތަކަށް ވެސް ހަމަލާތައް ދެމުންނެވެ.
