ދިވެހިރާއްޖޭގެ އައްޑޫ އާއި ކެންޔާގެ މުމްބާސާ އާއި އިންޑޮނީޝިއާގެ ޖަކާޓާއާ ދެމެދު އިކޮނޮމިކް ޓްރޭޑް ރޫޓެއް ނުވަތަ "އިކޮނޮމިކް ކޮރިޑޯ" އެއް ގާއިމް ކުރުމުގެ މަސައްކަތް ކުރީގެ ރައީސް މުހައްމަދު ނަޝީދުގެ ފައްޓަވައިފި އެވެ.
Advertisement
ނަޝީދު އެކްސްގައި އާންމުކުރެއްވި ވީޑިއޯއެއްގައި ވިދާޅުވީ، އައްޑުއަށް ލިބިފައިވާ އެންމެ ބޮޑު ނިއުމަތަކީ އެ އަތޮޅު ގުދުރަތީ ގޮތުން އުފެދިފައި އޮތް ތަން ކަމަށް ގަބޫލުކުރައްވާ ކަމަށެވެ. އެގޮތުން އައްޑޫ އޮތީ އިންޑިއާ ކަނޑުގެ ސީދާ މެދުގައި ކަމަށްވާއިރު، އެއްކޮޅުގައި އެފްރިކާ އަދި އަނެއްކޮޅުގައި އިންޑޮނޭޝިއާއާއި މެލޭޝިއާއާއި ސިންގަޕޫރު ފަދަ ގައުމުތައް އޮތްކަން އެ މަނިކުފާނު ފާހަގަކުރެއްވި އެވެ.
އިންޑިއާ ކަނޑަކީ ދުނިޔޭގެ އެކި ކަންކޮޅުތަކުން އެތައް ބޯޓު ފަހަރެއް މުދާ އުފުލަން ބޭނުން ކުރާ ރޫޓެއް ކަމަށާއި އޭގެ ފައިދާ އައްޑު އަށް ނެގޭނެ ކަން ނަޝީދު ފާހަގަކުރެއްވި އެވެ. އެގޮތުން އެ މަނިކުފާނު ހިޔާލަކީ އައްޑޫގައި ގްރީން އިކޮނޮމިކް ކޮރިޑޯއެއް ގާއިމް ކުރުން ކަން ހާމަކުރެއްވި އެވެ.
"މި ކޮރިޑޯ ފަށަން އެންމެ ރަނގަޅު ތަނެއް ކަމަށް އަޅުގަނޑަށް ފެންނަނީ ކެންޔާގެ މުމްބާސާ، ދެން އައިސް އައްޑޫ، ގޮސް ނިންމަން އިންޑޮނޭޝިއާގެ ޖަކާޓާ. ތިޔަ ބޭފުޅުން އިންޑިއާ ކަނޑުގެ ޗާޓު ބައްލައްވާލެއްވީމަ އަޅުގަނޑު މި ދަންނަވާ ވާހަކަ ބޮޑަށް ސާފު ވާނެ،" ނަޝީދު ވިދާޅުވި އެވެ.
ނަޝީދު ވިދާޅުވީ، ދުނިޔޭގެ ވަރަށް ގިނަ މުދާ އިންޑިއާ ކަނޑުން ދަތުރު ކުރާއިރު، އެ ކަނޑުގެ "ސީދާ މެދުގައި" އޮތް އައްޑޫއިން އޭގެ ފައިދާ ނުނަގައި ތިބެންޖެހޭ ސަބަބެއް ނެތް ކަމަށެވެ.
"އަޅުގަނޑަށް ފެންނަ ގޮތުގައި އައްޑޫ އަތޮޅުގެ އެންމެ ބޮޑު ނިއުމަތަކީ އެ އަތޮޅު ގުދުރަތީ ގޮތުން އުފެދިފައި އެ އޮތް ތަން. އިންޑިއާ ކަނޑުގެ ސީދާ މެދުގައި. އެއްކޮޅުގައި އެ އޮތީ އެފްރިކާ. އަނެއްކޮޅުގައި މި އޮތީ ފާ އީސްޓް ނުވަތަ އިންޑޮނީޝިއާ އާއި މެލޭޝިޔާ އާއި ސިންގަޕޫރާ މި ގައުމުތައް. އިންޑިއާ ކަނޑަކީ ވަރަށް ގިނަ ބޯޓުފަހަރު ދަތުރު ކުރާ ކަނޑެއް. ދުނިޔޭގެ އެތަންމިތަނުން އުފުލާ ވަރަށް ގިނަ މުދާ މި އުފުލެނީ އިންޑިއާ ކަނޑު ހުރަސްކޮށް،" އެމަނިކުފާނު ވިދާޅުވި އެވެ.
ނަޝީދު ވިދާޅުވީ އެ މަނިކުފާނު ދާދި ފަހުން ކެންޔާގެ ރައީސް ވިލިއަމް ރޫޓޯއާ ބައްދަލުކުރައްވައި، އެ އިކޮނޮމިކް ކޮރިޑޯއާ ގުޅޭ ގޮތުން ވާހަކަދެއްކެވި ކަމަށެވެ. އަދި އެ ވާހަކަފުޅަށް އިޖާބަ ދެއްވައި، ކެންޔާގެ ރައީސް ހުންނެވީ ފީސިބިލިޓީ ޓެސްޓެއް ހަދަން ތައްޔާރަށް ކަމަށް ވެސް އެ މަނިކުފާނު ވިދާޅުވި އެވެ.
