ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި މިނިސްޓަރާ ސުވާލުކުރީ ދަރިވަރުންނަށް ފައިސާ ދޫކުރުމުގައި ލަސްތަކެއް އުޅޭތޯ އާއި ދޫނުކުރެވޭ ނަމަ ލަސްވަނީ ކޮން ސަބަބަކާހުރެތޯ އެވެ.
އެ ސުވާލަށް ޖަވާބު ދެއްވަމުން މިނިސްޓަރު ވިދާޅުވީ ބައެއް ގައުމުތަކުގައި ކިޔަވާ ދަރިވަރުންނަށް ފައިސާ ލިބުމުގައި ދަތިތަކެއް އުޅޭ ކަމަށެވެ. އޭނާ ފާހަގަކުރެއްވި ގޮތުގައި، ދަރިވަރުންނަށް ފައިސާ ދޫކުރަނީ ތިން އިދާރާއަކުން ބަލާފަ އެވެ. ނަމަވެސް، މިހާރު އެ މައްސަލަ ދިމާވާ މިންވަރު ކުރިއަށް ވުރެ މަދު ކަމަށް މިނިސްޓަރު ގަބޫލުކުރައްވައެވެ.
ހައިދަރު ވިދާޅުވީ، މިއަހަރުގެ ލޯނު ސްކީމަށް އެދުމުގެ ފުރުސަތު ހުޅުވާލުމަށްޓަކައި ޕޯޓަލް ތައްޔާރުކުރުމާއި އުސޫލު އެކުލަވާލުމުގެ މަސައްކަތް ކުރަމުންދާކަމަށެވެ. އެގޮތުން، ސްކީމުގެ ކަންކަން ހަރުދަނާކުރުމަށްޓަކައި ކުރާ މަސައްކަތުގެ ތެރެއިން އެޕްލިކޭޝަން ޑެޑްލައިނެއް ނުބާއްވައި ލޯނަށް އެދުމުގެ ފުރުސަތު މުޅި އަހަރަށް ހުޅުވާލާގޮތަށް ހަމަޖައްސާފައިވާކަމަށާއި މިކަމުގެ ސަބަބުން ލޯނަށް އެދޭ ދަރިވަރުންނަށް ފަސޭހަތަކެއް ލިބިގެންދާނެކަން ހައިދަރު ފާހަގަކުރެއްވި އެވެ.
އެއާއެކު، އެންމެ ގިނައިން ދަރިވަރުން ކިޔަވާ ގައުމުތަކުގެ ސްޓައިޕެންޑު މުރާޖާކުރުން އަވަހަށް ނިންމޭތޯ ބަލާނެ ކަމަށާއި އިތުރަށް ހުރި ގައުމުތަކުގައި އެ އުސޫލުން ކަންކަން ނިންމާނެ ކަމަށް އޭނާ ވިދާޅުވި އެވެ.
ހައިދަރު އިތުރަށް ވިދާޅުވީ، ސްޓޫޑެންޓް ލޯނަށް އެދި ހުށަހެޅުމުގެ ފުރުސަތު މި ފެށޭ ބަންދު ދުވަސްތަކަށްފަހު ހުޅުވާލެވޭނެކަމަށެވެ. ހަމައެއާއެކު، ލޯނަށް އެދެން ބޭނުންވާ ދަރިވަރުން ދުރާލާ ލިޔުންތައް ފުރިހަމަކޮށް ތައްޔާރުވުމަށް އިލްތިމާސްކުރައްވައި ހައިދަރު ވިދާޅުވީ، ފުރިހަމަ އެޕްލިކޭޝަނެއް ހުށަހަޅާ ދަރިވަރަކަށް ލޯނުގެ ފައިސާ ހަމަޖެހިގެން ދިޔުން އެހެން އަހަރުތަކާ އަޅާބަލާއިރު ވަރަށް ބޮޑަށް އަވަސްވާނެކަމަށެވެ.
މިދިޔަ އަހަރު ރައީސް ޑރ. މުހައްމަދު މުއިއްޒު ވަނީ، ސްޓޫޑެންޓް ލޯނުގެ ފައިސާ އަނބުރާ ދައްކާއިރު އެއްވެސް އިތުރު ސަރވިސް ޗާޖެއް ނުނަގާގޮތަށް ނިންމަވާފަ އެވެ. ރައީސް މިގޮތަށް ނިންމެވީ، ދަރިވަރުންނަށް ދޫކުރެވެނީ ޝަރީޢާ ކޮމްޕްލަޔަންޓް ލޯނަކަށް ހެދުމުގެ ބޭނުމުގަ އެވެ.
ފާހަގަކުރެވޭ ގޮތުގައި، ދަރިވަރުންގެ ލޯނަށް މިދިޔަ ފެބްރުވަރީ މަހުގެ 27ވަނަ ދުވަހުގެ ނިޔަލަށް 79.1 މިލިއަން ރުފިޔާ ހަރަދުކޮށްފައިވާ ކަމަށް ފިނޭންސް މިނިސްޓްރީގެ ހިސާބުތަކުން ވަނީ ދައްކާފަ އެވެ. އެއީ ދަރިވަރުންގެ ލޯނަށް ހަރަދުކުރުމަށް މިއަހަރުގެ ބަޖެޓުން ކަނޑައަޅާފައިވާ އަދަދު ކަމަށްވާ 776.6 މިލިއަން ރުފިޔާގެ 10.2 އިންސައްތައެވެ.
