މި މަހުގެ 2 ވަނަ ދުވަހު މިކަން ރަސްމީކޮށް އިއުލާނުކުރުމާއެކު، ފިލްމީ ދާއިރާގެ ގިނަ ބަޔަކަށް ވަނީ ބޮޑު ސިއްސުމެއް ލިބިފައެވެ. ރިޕޯޓުތައް ބުނާ ގޮތުގައި މި ރޯލަށް ނަވާޒުއްދީން ހަމަޖެއްސީ އެކްޓަރު އަކްޝޭ ކަންނާ އާއި އޭނާއާ ދެމެދު ބޭއްވި ބޮޑު ކާސްޓިން ވާދަވެރިކަމަކަށްފަހުއެވެ.
މި ފިލްމުގައި ނަވާޒުއްދީން ކުޅޭނީ ވަރަށް ސިއްރުވެރި އަދި ގިނަ ފަންތިތަކެއް އެކުލެވޭ ރޯލެއް ކަމަށް ފިލްމުގެ ޕްރޮޑަކްޝަން ޓީމުން ބުންޏެވެ. ނަވާޒުއްދީން ބުނީ އޭނާ މި ފިލްމަށް އެއްބަސްވީ ފުރަތަމަ ބައިގެ ވާހަކަ ކިޔައިދީފައިވާ ގޮތް ވަރަށް ބޮޑަށް ކަމުދިޔުމުން ކަމަށެވެ. ފިލްމުގެ ޕްރޮޑިއުސަރު ސޯހަމް ޝާހު ބުނީ ނަވާޒުއްދީންގެ ކެރެކްޓާއާއެކު "ތުމްބާޑް" ގެ ދުނިޔެ މާ ބޮޑަށް ފުޅާވެގެންދާނެ ކަމަށެވެ.
"ތުމްބާޑް 2" ގެ ޑައިރެކްޓަރަކަށް މިފަހަރު ހަމަޖައްސާފައިވަނީ ފުރަތަމަ ބައިގެ ކޯ-ޑައިރެކްޓަރު އަދޭޝް ޕްރަސާދުއެވެ. މި ފިލްމު އުފެއްދުމުގައި "އާރްއާރްއާރް" ފަދަ ބޮޑު ފިލްމުތައް އުފެއްދި ޕެން ސްޓޫޑިއޯސްއިން ބައިވެރިވާއިރު، ފިލްމުގެ ވިޝުއަލް އިފެކްޓްސް ތައްޔާރުކުރުމަށް ހޮލީވުޑްގެ މާހިރުން ބޭނުންކުރުމަށް ވަނީ ނިންމާފައެވެ. މި ފިލްމުގެ މަސައްކަތް ވަރަށް އަވަހަށް ފެށުމަށް ހަމަޖެހިފައިވާއިރު، ފިލްމު ރިލީޒްކުރާނީ 2026 ވަނަ އަހަރުގެ ފަހުކޮޅުގައެވެ.
