މާލޭގައި ވަރަށް ހާލުގައި ކުދިކުދި ތަންތަނުގައި ދިރިއުޅެމުންދާ މީހުން ހޯދާ އެ މީހުންނަށް ލުޔެއް ހޯދައިދިނުމުގެ މަސައްކަތް ކުރަމުން އަންނަ ކަމަށް ހައުސިން މިނިސްޓަރު ޑރ. އަބްދުﷲ މުއްތަލިބު މިއަދު ވިދާޅުވެއްޖެއެވެ
Advertisement
މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން މުއްތަލިބު ވިދާޅުވީ، ރައީސް ޑރ. މުހައްމަދު މުއިއްޒު މާލޭގެ ގެތަކަށް ކުރެެއްވި ޒިޔާރަތުގައި މާލެއަށް ނިސްބަތްވާ ބައެއް މީހުން ވަރަށް ހާލުގައި ކުދި ތަންތަން ކޮޅުގައި އުޅޭކަން ފާހަގަކުރެވުނު ކަމަށެވެ.
އެގޮތުން އެއީ އެކި ސަބަބުތަކާ ހެދި ގޯތި ނުހެދި އަދި ގޯތި ބައިބައިކުރަން ޖެހުމާއި އެކު ކުދި ތަންތަންކޮޅުގައި އުޅެން ޖެހިފައިވާ އަދި އެމީހުންނަކީ ސަރުކާރުގެ ބޯހިޔާވަހިކަމުގެ މަޝްރޫއުތަކުގެ ތެރެއިން ވެސް ހައްލެއް ނުލިބިފައިވާ މީހުން ކަމަށް މިނިސްޓަރު މުއްތަލިބް ވިދާޅުވިއެވެ.
"އެކަކަށް ވަދެވޭ ވަރުގެ ހަނި ގޯޅިތައް ވެސް އެބަހުރި، އެކަކަށް އަރިއަކަށް ހުރެގެން ވަންނަން ޖެހޭ ފަދަ ގޯޅިތައް ވެސް އަޅުގަނޑުމެންނަށް ފެނިފައި އެބަހުރި، އެއްވެސް ކަހަލަ ވެންޓިލޭޝަނެއް ނެތް، އިންސާނުންނަށް އެކަށީގެންނުވާ ފަދަ، ދިރުނޫޅެވޭ ތަންތަން ވެސް އެބަހުރި،" މުއްތަލިބް ވިދާޅުވިއެވެ.
މުއްތަލިބު ވިދާޅުވީ، ސަރުކާރުގެ ވިސްނުމަކީ އެގޮތަށް ހުރި ތަންތަން ދެނެގަނެ، އެ އާއިލާތަކުގެ ހާލަތު ރަނގަޅުކުރެވޭނެ ގޮތަކަށް ކަންތައްތައް ކުރިއަށްގެންދިޔުން ކަމަށެވެ.
" އެގޮތަށް ހުރި ތަންތަން އައިޑެންޓިފައި ކޮށްފައި އެފަރާތްތައް އެއަށް ވުރެ ހާލަތު ރަނގަޅު ކުރެވޭނެ ގޮތަކަށް ކަންކަން ކުރިއަށް ގެންދިއުން. މާނައަކީ ވަކި އުސޫލެއް ހަދައިގެން އެޕްލައިކުރުވުމުގެ ބަދަލުގައި އެފަދަ ތަންތަން ފާހަގަކޮށް، އެފަދަ ގޮތަކަށް ނިކަމެތިކޮށް ތިބި އާއިލާތައް ޑޮކިއުމަންޓްކޮށް އެ އާއިލާތައް ތިބި ހާލަތު ނެރުން،" މިނިސްޓަރު ވިދާޅުވިއެވެ.
އެހެންކަމުން އެކަމަށް ސިޔާސަތުތަކަށް ގެންނަން ޖެހޭ ބަދަލުތައް ގެނައުމުގެ މަސައްކަތް ސަރުކާރުން ކުރާ ކަމަށް ހައުސިން މިނިސްޓަރު މުއްތަލިބު ވިދާޅުވިއެވެ.
