ހޯމްލޭންޑް މިނިސްޓްރީން ކުރަމުން އަންނަ މަސައްކަތްތަކުގެ ތަފްސީލުތައް ދިނުމަށް މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި މިނިސްޓަރު އަލީ އިހްސާން ވަނީ މިދިޔަ ދޮޅުމަހު އަތުލައިގެން މަސްތުވާތަކެތީގެ އަދަދު ހާމަކޮށްފައެވެ.
އެގޮތުން މިދިޔަ ދޮޅުމެހެއްހާ ދުވަހުގެ ތެރޭގައި 83 ކިލޯއަށް ވުރެ ގިނަ ޑްރަގު އަތުލައިގެންފައިވާކަމަށް މިނިސްޓަރރު ވިދާޅުވިއެވެ. އަދި މިތަކެތީގެ މަގުމަތީ އަގު ގާތްގަނޑަކަށް 72.2 މިލިއަން ރުފިޔާއަށް އަރާނެކަމަށްވެސް މިނިސްޓަރު އިހްސާން ވިދާޅުވިއެވެ.
މިނިސްޓަރު ވިދާޅުވީ ކަސްޓަމްސް އާއި ފުލުހުން ގުޅިގެން ހިންގި ތަފާތު އޮޕަރޭޝަންތަކުގައި އަތުލައިގަނެވުނު މަސްތުވާތަކެތިކަމަށެވެ.
މަސްތުވާތަކެތީގެ ސަޕްލައި މަދުކުރުމަކީ އެ މިނިސްޓްރީން އެންމެ އިސްކަމެއްދީގެން ކުރިއަށްގެންދާ އެއް މަސައްކަތް ކަމަށާއި މީ ކަސްޓަމްސްއިން ރާއްޖޭގެ ބޯޑާ ސެކިއުރިޓީ ބެލެހެއްޓުމުގައި މިހާރު ގެންގުޅޭ ތަފާތު ހުނަރުތަކާއި ފުލުހުން ރާއްޖޭގެ އެކި ކަންކޮޅުތަކުގައި ރެޔާ ދުވާލު ހުއްޓުމެއްނެތި މަސްތުވާތަކެއްޗާ ދެކޮޅަށް ކުރާ މަސައްކަތްތަކުގެ ނަތީޖާ ކަމަށްވެސް އިހުސާން ވިދާޅުވިއެވެ.
