މި މައްސަލައިގައި ކުށް ސާބިތުވެ، ފާރިޝްގެ މައްޗަށް ތިން އަހަރާއި ދެ މަސް ދުވަހާއި 12 ދުވަހަށް ޖަލަށް ލުމަށް ހުކުމްކުރީ މިދިޔަ ސެޕްޓެމްބަރު މަހުގެ ފަހުކޮޅުއެވެ.
ކަރެކްޝަނުން ބުނީ ފާރިޝްގެ ސިއްހީ ހާލަތާ ގުޅިގެން ވަގުތީ ގޮތުން އޭނާ ގޭބަންދަށް ދޫކޮށްލާފައިވާކަމަށެވެ. އެހެންނަމަވެސް އިތުރު ތަފްސީލެއް ކަރެކްޝަނަކުން ނުދެއެވެ.
ދައުލަތުން އަލީ ފާރިޝްގެ މައްޗަށް ދައުވާކުރީ ރާއްޖެއިން އުމްރާއަށް މީހުން ގެންދަން އޭސް އޭވިއޭޝަން ސާވިސް އާއި އޭސް ޓްރެވެލް މޯލްޑިވްސް މެދުވެރިކޮށް 48 މީހެއްގެ ޓިކެޓު ބުކިން ހެދުމަށް ފަހު، ފައިސާ ނުދެއްކި މައްސަލައިގަ އެވެ. އެ ޓިކެޓްތަކަށް ދައްކަންޖެހޭ ފައިސާ ދެއްކުމުގެ ގޮތުން އެ ކުންފުނީގެ އެކައުންޓުން ދޫކުރި ދެ ޗެކެއް ބައުންސްވީއެވެ. އެއީ 390،126ރ. ޗެކަކާއި 156،050ރ. ގެ ޗެކެކެވެ.
މި މައްސަލާގައި އޭނާ ޖަލަށްލުމުގެ އިތުރުން އޭސް އޭވިއޭޝަނާއި އޭސް ޓްރެވެލަށް ލިބުނު ގެއްލުމުގެ ބަދަލުގެ ގޮތުގައި 26،350.32 ޑޮލަރު ނުވަތަ 406،321ރ. އެ ކުންފުންޏަށް ދައްކަންޖެހޭ ކަމަށާއި އެ ފައިސާ ދެ އަހަރުގެ ތެރޭގައި ދެއްކުމަށް އެ ހުކުމްގައި އަމުރުކޮށްފައިވެ އެވެ.
