ސްރީ ލަންކާގެ ރައީސް އަނޫރާ ކުމާރަ ޑިސެނަޔަކަށް ޓީވީ މެދުވެރިކޮށް ދެއްވި ބަޔާނެއްގައި މިކަން ހާމަކުރައްވަމުން ވިދާޅުވީ އައިރިސް ބުޝެހެރް ލަންކާގެ ބަނދަރަށް ވަނުމުގެ ހުއްދައަށް އެދުނީ އިންޖީނަށް ދިމާވި މައްސަލައަކާ ގުޅިގެން ކަމަށެވެ. 

ލަންކާގެ އަސްކަރިއްޔާއިން މިހާރު އެ މަސައްކަތް ފަށާފައިވާ ކަމަށާއި އެ މީހުން ސަލާމަތްކުރެވުމުން މަޖިލީހަށް ރިޕޯޓެއް ހުށަހަޅާނެ ކަމަށް ލަންކާގެ ސަރުކާރުން ވަނީ ބުނެފަ އެވެ.

އެ މަނަވަރުން 100 އަށްވުރެ ގިނަ މީހުން ދަތުރުކުރަމުން އަންނަ ކަމަށް އެ ގައުމުގެ މީޑިއާތަކުން ރިޕޯޓުކުރެ އެވެ.

އިއްޔެ އެމެރިކާއިން ވަނީ ލަންކާގެ އައްސޭރިފަށުން ފެށިގެން 19 ނޯޓިކަލް މޭލު ބޭރުން އިރާނުގެ މަނަވަރެއް ފައްތާލާފަ އެވެ. އެމެރިކާގެ ސަބްމެރިންއަކުން އިއްޔެ ދިން ހަމަލާއަކުން ސަލާމަތްވި ފަޅުވެރިންނަށް ލަންކާގެ ގޯލް ސިޓީގެ ހޮސްޕިޓަލެއްގައި މިހާރު ފަރުވާދެމުން އެބަދެ އެވެ.

އެމެރިކާއިން ފައްތާލި އީރާނުގެ މަނަވަރުގައި ތިބި މީހުންގެ ތެރެއިން މަރުވި މީހެއްގެ ހަށިގަނޑު ލަންކާގެ ހޮސްޕިޓަލަކަށް ގެންދަނީ. - ފޮޓޯ/އޭޕީ

ގޯލްގެ ނޭޝަނަލް ހޮސްޕިޓަލުގެ އޮފިޝަލުން ވިދާޅުވި ގޮތުގައި، އިއްޔެ އެހީއަށް އެދި ގޮވުމަށް ފަހު އަޑިއަށްދިޔަ އީރާނުގެ ފްރިގޭޓް އައިއާރުއައިއެސް ޑަނާ އިން މަރުވި 87 މީހެއްގެ ހަށިގަނޑު މިހާތަނަށް ވަނީ އެއްގަމަށް ގެނެސްފަ އެވެ.

ގެއްލިފައިވާ ކަމަށް ބެލެވޭ 60 ފަޅުވެރިން ހޯދުމުގެ މަސައްކަތް އަދިވެސް ކުރިއަށްދާއިރު، ސަލާމަތްވި 32 ފަޅުވެރިންނަށް ލިބިފައިވާ ކުދި އަނިޔާތަކަށް ފަރުވާ ދިނުމަށް ފަހު، ވަރަށް އަވަހަށް ހޮސްޕިޓަލުން ދޫކޮށްލާނެ ކަމަށްވެ އެވެ.

އެމެރިކާގެ ޑިފެންސް ސެކްރެޓަރީ ޕީޓް ހެގްސެތު ވަނީ މި ހަމަލާ ދީފައިވަނީ އެމެރިކާގެ ސަބްމެރިންއަކުން ކަމަށް ކަށަވަރުކޮށްދެއްވާފަ އެވެ. އޭނާ ވިދާޅުވީ، ބައިނަލްއަގުވާމީ ކަނޑުގެ ސަރަހައްދުގައި ރައްކާތެރިކަމާ އެކު އޮތް ކަމަށް އީރާނުން ހީކުރި ހަނގުރާމަމަތީ މަނަވަރު، އެމެރިކާގެ ސަބްމެރިންއަކުން ފޮނުވާލި ޓޯޕިޑޯ ހަމަލާއެއްގައި ފައްތާލާފައިވާ ކަމަށެވެ.