ކެލިފޯނިއާ ހައިވޭ ޕެޓްރޯލުން އޭނާ ހައްޔަރުކުރުމަށްފަހު ފަހުން ވަނީ ދޫކޮށްލާފައެވެ. އަދި އޭނާ ދުއްވި ކާރު ވެސް ފުލުހުންގެ ބެލުމުގެ ދަށަށް ގެންދިޔަ ކަމަށް ރިޕޯޓުތައް ބުނެއެވެ.
މިކަމާ ގުޅިގެން ބްރިޓްނީގެ މަންދޫބަކު ބުނީ، މިއީ ހިތާމަވެރި އަދި އެއްގޮތަކަށް ވެސް ބަލައިގަނެވޭނެ ކަމެއް ނޫން ކަމަށެވެ. ނަމަވެސް މިއީ އޭނާގެ ދިރިއުޅުމަށް އަންނަންޖެހޭ ހެޔޮ ބަދަލުތަކުގެ ފެށުން ކަމަށް އުންމީދުކުރާ ކަމަށާއި، މި ދަތި ދަނޑިވަޅުގައި އޭނާއަށް ބޭނުންވާ އެހީތެރިކަން ލިބޭނެ ކަމަށް އުންމީދުކުރާ ކަމަށް ވެސް މަންދޫބު ބުންޏެވެ. އަދި އޭނާގެ އާއިލާއާއި ގާތް މީހުން ގުޅިގެން އޭނާގެ ރަނގަޅަކަށް ޕްލޭނެއް އެކުލަވާލާނެ ކަމަށް ވެސް ވަނީ ބުނެފައެވެ.
ބްރިޓްނީ ވަނީ މީގެ ކުރިން ވެސް ގާނޫނީ އަދި ނަފްސާނީ ގިނަ މައްސަލަތަކަކާ ކުރިމަތިލާފައެވެ. އެގޮތުން 13 އަހަރު ވަންދެން އޭނާގެ ބައްޕަގެ ބެލުމުގެ ދަށުގައި އޭނާގެ މުދަލާއި ކަންކަން އޮތުމަށްފަހު، އެކަން ނިމުމަކަށް އައީ 2021 ވަނަ އަހަރުއެވެ. އޭގެ ފަހުން އާންމުކޮށް ސޯޝަލް މީޑިއާއިން އޭނާ ފެންނަމުން ދިޔަ ނަމަވެސް، މި ހާދިސާއަށްފަހު ބުރާސްފަތި ދުވަހު އޭނާގެ އިންސްޓަގްރާމް އެކައުންޓު ވެސް ވަނީ ގެއްލިފައެވެ. މި މައްސަލައާ ގުޅިގެން އަންނަ މެއި މަހުގެ 4 ވަނަ ދުވަހު ބްރިޓްނީ ކޯޓަށް ހާޒިރުވާން ޖެހޭނެއެވެ.
