ބަންޑާަރ މިސްކިތް ތަޅާލާ އެތަނުގައި އާ މިސްކިތެއް އަޅަން އިސްލާމިކް މިނިސްޓަރު ޑރ. ޝަހީމް އިއުލާންކުރެއްވުމާއި ގުޅިގެން ޑރ. ޙަސަން ހަމީދު ވަނީ އެ މިސްކިތުގެ ތާރިހު ކިޔާދެއްވާ މަޒުމޫނެއް ނެރުއްވާފައެވެ.
ހަސަން ހަމީދު ވިދާޅުވީ ބަންޑާރަ މިސްކިތް ތަޅާލުމަކީ ތަރިކައެއް ނައްތާލުން ކަމަށެވެ. ބަންޑާރަ މިސްކިތަކީ ދިވެހިރާއްޖޭގެ ތާރީހާ ވަރަށް ބޮޑަށް ގުޅިފައިވާ މިސްކިތެއް ކަމަށް ވިދާޅުވެ ހަސަން ހަމީދު ވިދާޅުވީ އެކަން އެނގޭނީ، ދިވެހި ތާރީހާ ބެހޭ ފޮތްތައްކިޔާ އެއިން ދަރިވަރުވީ ބަޔަކަށް ކަމަށެވެ.
ހަސަން ހަމީދުގެ މަޒުމޫނުގައިވަނީ އެސްޓިއޯ އުފެދުމުގެ ތާރީހުވެސް ގޮސް ގުޅިފައިވަނީ ބަންޑާރަ މިސްކިތާކަން ފާހަގަކުރައްވާފައެވެ.
ހަސަން ހަމީދު ވިދާޅުވީ ވޭތިވެދިޔަ ދެ އަހަރެއްގެ ތެރޭގައި ސަރުކާރުން ހާމަކޮށްފައިވާ ސިޔާސަތާ ކަނޑައެޅިގެން ހިލާފު ކަންތައްތައް، އިސްލާމިކް މިނިސްޓްރީން ކޮށްފައިވާކަމަށެވެ. އެގޮތުން ފުރަތަމަ ކަމެއްގެ ގޮތުގައި އޭނާ ފާހަގަކުރެއްވީ، އިސްލާމިކް މިނިސްޓްރީއަށް ޝަހީމް އައްޔަންކުރިތާ މާ ގިނަ ދުވަހެއްނުވެ، ޒަކާތާ ބެހޭ އޮފީހަށް "ޒަކާތު ހައުސް"ގެ ނަމުން ނަންދިންކަމަވެެ.
ރައީސް ޑރ. މުހައްމަދު މުއިއްޒު ވެރިކަމަށް ވަޑައިގަތީ ގައުމިއްޔަތާއި ގައުމަށް އިސްކަންދޭނެ ކަމަށް ވަކާލާތުކުރައްވައިގެން ކަމަށްވާއިރު، ޒަކާތާ ބެހޭ އޮފީހަށް އިނގިރޭސި ނަމެއް ދިނުމުން އެކމާއި ގުޅޭގޮތުން ހަސަން ހަމީދު ވަނީ ސުވާލު އުފައްދަވާފައެވެ.
މީގެއިތުރުން އިސްލާމް މާއްދާ އިނގިރޭސި ބަހުން ކިޔަވައިދިނުން އެންމެ ރަނގަޅު ކަމަށް ޝަހީމް ވިދާޅުވި ވިދާޅުވުންވެސް ހަސަން ހަމީދު ވަނީ ފާހަގަކުރައްވާފައެވެ. އެގޮތުން އިސްލާމް މާއްދާ އިނގިރޭސި ބަހުން ކިޔަވައިދިނުމަކީ ގައުމިއްޔަތާއި ދިވެހިއްޔަތަށް އިސްކަން ދިނުންތޯ ހަސަން ހަމީދު ވަނީސުވާލު އުފައްދަވައިފައެވެ.
މި ސަރުކާރު ހިންގަމުން ގެންދަނީ އެމީހަކު ހިތައް އެރި ގޮތަކަށްކަން ފާހަގަކުރައްވާ ހަސަން ހަމީދު ވިދާޅުވީ މިނިސްޓަރުންވެސް 'އެ މީހުންގެ ހިތަށް އެރިހާ ގޮތަކަށް ކަންތައްތައް ކުރަމުންދާކަމަށެވެ. އަދި މިހާލަރުން އަރައިގަންނަން އެންމެ އެކުގައި މަސައްކަތް ކުރަންޖެހޭކަމަށް ހަސަން ހަމީދު ވިދާޅުވިއެވެ.
ބަންޑާރަ މިސްކިތް ތަޅާލުމާއި ދެކޮޅަށް ވާހަކަ ދެެއްކި މީހުންނާ ސޯޝަލް މީޑިއާގައި ރޭ ޒުވާބުކުރެެއްވުމަށްފަހު މިނިސްޓަރު ޝަހީމް ފަހުން ވަނީ ކަންކަން ނިންމާނީ ރައްޔިތުން ބޭނުންވާ ގޮތަށްކަމަށް ވިދާޅުވެ މިކަމުގައި މަޝްވަރާކުރަން ތައްޔާރަށް ހުންނެވިކަމަށް ވިދާޅުވެފައެވެ.
