މި ހާދިސާ ހިނގާފައިވަނީ ފިލްމުގެ އެކްޝަން މަންޒަރެއްގައި ވައިގެ ތެރޭގައި އެނބުރިފައި ކިކެއް ޖަހަން އުޅުމުގެ ތެރޭގައެވެ. މި މަންޒަރު ފެންނަ ވީޑިއޯއެއް މިހާރު ވަނީ ސޯޝަލް މީޑިއާގައި ވަރަށް ބޮޑަށް އާންމުވެފައެވެ.
އަކްޝޭއަށް ލިބުނު އަނިޔާއަކީ އެހާ ސީރިއަސް އަނިޔާއެއް ނޫން ކަމަށް ރިޕޯޓުތައް ބުނެއެވެ. ކުޑަވަގުތުކޮޅަކު އަރާމު ކުރުމަށްފަހު އޭނާ ވަނީ އަލުން މަސައްކަތަށް ނިކުމެފައެވެ. އަކްޝޭއަކީ އާންމުކޮށް ވެސް ބޮޑެތި ސްޓަންޓްތައް އަމިއްލައަށް ހަދާ ތަރިއެކެވެ. އޭނާ ބުނާ ގޮތުގައި އެކްޝަން މަންޒަރުތަކުގައި ކޮމްޕިއުޓަރުގެ އެހީގައި ހަދާ މަންޒަރުތަކަށްވުރެ އަމިއްލައަށް ކުރާ ކަންތައްތައް ބެލުންތެރިންނަށް މާ ބޮޑަށް ކަމުދާނެއެވެ.
ޕްރިޔަދަރުޝަން ޑައިރެކްޓްކުރާ މި ފިލްމުގައި އަކްޝޭއާއެކު ތާބޫ، ޕަރޭޝް ރާވަލް އަދި ރާޖްޕާލް ޔާދަވް ފަދަ ތަރިން ފެންނާނެއެވެ. މި ފިލްމަކީ ގާތްގަނޑަކަށް 14 އަހަރަށްފަހު އަކްޝޭ އާއި ޕްރިޔަދަރުޝަން އެކުގައި މަސައްކަތްކުރާ ފުރަތަމަ ފިލްމެވެ.
މި ފިލްމު ސިނަމާތަކުގައި ދައްކަން ފަށާނީ މިއަހަރުގެ އެޕްރީލް މަހުގެ 17 ވަނަ ދުވަހުއެވެ. ފިލްމުގެ ޓްރެއިލާ މިހާރު ނެރެފައިވާއިރު، ބެލުންތެރިންގެ މެދުގައި މި ފިލްމަށް އޮތް އިންތިޒާރު ވަނީ ވަރަށް ބޮޑުވެފައެވެ.
