ސްރުކާރު ސްކޫލްތަކުގެ ހުރިހާ ދަރިވަރުންނަށް ހިލޭ ނަސްތާ ދިނުމުގެ ޕްރޮގްރާމް ފެށީ މިދިޔަ ސަރުކާރުންނެވެ. އެހެންނަމަވެސް އެ ކަމުގައި ކޮރަޕްޝަންތައް ހުރިކަމަށް ބުނެ މި ސަރުކާރުން ވެރިކަމަށް އައުމަށްފަހު އެ މަޝްރޫއު ވަނީ ހުއްޓާލާފަ އެވެ.
މިދިޔަ ސަރުކާރުން ހިލޭ ނަސްތާ ޕްރޮގްރާމް ހިންގުމަށް ގާނޫނުގައި ހިމެނި ސަރުކާރުގެ ކޮންމެ ސްކޫލަކުން ހެނދުނު ނާސްތާ ފޯރުކޮށްދޭން ޖެހޭނަކަމަށް ބުނި މާއްދާ އިސްލާހުކުރަން މިއަދު ވަނީ ސަރުކާރުން ހުށައަޅާފަ އެވެ.
ސަރުކާރުގެ ފަރާތުން، ތަޢުލީމުގެ ޤާނޫނު އަށް އިސްލާހުތަކެއް ހުށައަޅުއްވާފައިވަނީ ހުރާ ދާއިރާގެ މެންބަރު ޑރ. އަނާރާ ނައީމް އެވެ. އޭނާ ގާނުނަށް ގެންނަ ހުށައެޅި އިސްލާހުގައި ވަނީ ސްކޫލް ގަޑީގައި ނާސްތާ ލިބުން ދަތިވާ ދަރިވަރުންނަށް މިނިސްޓްރީން ކަނޑައަޅާ ގޮތެއްގެ މަތިން ހަމަހަމަ އުސޫލަކުން ސަރުކާރުގެ ކޮންމެ ސްކޫލަކުން ހިލޭ ނާސްތާ ފޯރުކޮށްދޭން ޖެހޭނެކަމަށެވެ.
