މި މަހުގެ 15 ގައި އާންމުކުރި މި ލިސްޓުގައި ހިމެނުނު އިންޑިއާގެ ހަމައެކަނި އެކްޓަރަކީ ރަންބީރު އެވެ. މި ލިސްޓުގައި ދެން ހިމެނޭ އިންޑިއާގެ ފާހަގަކޮށްލެވޭ މީހުންގެ ތެރޭގައި ގޫގުލްގެ ސީއީއޯ ސުންދަރު ޕިޗާއީ އާއި މަޝްހޫރު ޝެފް ވިކާސް ހާން ހިމެނެ އެވެ.
ރަންބީރުގެ މި ކާމިޔާބީއާ ގުޅޭގޮތުން ޓައިމް މެގަޒިންގައި އޭނާގެ ޕްރޮފައިލް ލިޔެދިނީ އެކްޓަރު އަޔުޝްމާން ކުރާނާ އެވެ. އަޔުޝްމާން ބުނީ ރަންބީރަކީ ހަމައެކަނި ކާމިޔާބު ފިލްމުތަކެއް ކުޅޭ ތަރިއެއް ނޫން ކަމަށާއި، އޭނާ އަކީ އޭނާގެ ހުނަރުން އަމިއްލަ ވަަނަވަރެއް ބިނާކޮށްފައިވާ ފަންނާނެއް ކަމަށެވެ. އަދި އިންޑިއާގެ ސިނަމާގައި މީހުންގެ މަގުބޫލުކަން މިނަނީ ބޮކްސް އޮފީސް ނަންބަރުތަކުން ކަމަށް ވިޔަސް، ރަންބީރު ބަދަލުކޮށްލީ ބެލުންތެރިންގެ އިހުސާސްތައް ދެނެގަންނަ ގޮތް ކަމަށް އަޔުޝްމާން ފާހަގަކުރި އެވެ.
ޓައިމް މެގަޒިން އިން ފާހަގަކުރި ގޮތުގައި ރަންބީރު މި ލިސްޓަށް ހޮވުނީ އޭނާގެ ހުނަރުވެރިކަމުގެ ސަބަބުން އިންޑިއާގެ ސަގާފަތާއި ކުރިއަރަމުން އަންނަ އާ ވިސްނުންތައް ދުނިޔެއަށް ދައްކައިދޭ ބްރިޖެއްގެ ގޮތުގަ އެވެ. ހާއްސަކޮށް، ނިތޭޝް ތިވާރީ ޑައިރެކްޓްކޮށް 2026 ވަނަ އަހަރު ނެރުމަށް ތައްޔާރުވަމުންދާ "ރާމާޔަނަ" ފިލްމުގައި ރަންބީރު އަދާކުރާ ލޯޑް ރާމާގެ ރޯލަކީ އޭނާގެ މަގުބޫލުކަން ބައިނަލްއަގުވާމީ ފެންވަރުގައި އިތުރުވެގެންދާނެ ކަމެއް ކަމަށް ބެލެވެ އެވެ.
މިއީ ބޮލީވުޑްގެ އެކްޓަރަކަށް މި އަހަރު ލިބުނު އެންމެ ބޮޑު އެއް ޝަރަފެވެ. ރަންބީރުގެ މަސައްކަތްތަކުން ދުނިޔޭގެ އެކި ކަންކޮޅުތަކުގައި ތިބި ބެލުންތެރިންނަށް އިންޑިއާގެ މުއްސަނދި ވާހަކަތަކާއި ސަގާފަތް ތަފާތު ގޮތަކަށް ފެނިގެންދާ ކަމަށް ގިނަ ބަޔަކު ގަބޫލުކުރެ އެވެ.
