އެމެރިކާގެ ސެންޓްރަލް ކޮމާންޑުން ބުނި ގޮތުގައި، ހޯމަ ދުވަހު އެމެރިކާގެ ސިފައިން ވަނީ އީރާނުގެ ދެކުނު ސަރަހައްދުގައި ހުރި މިސައިލް ސައިޓްތަކަށާއި، ކަނޑުގެ ސަރަހައްދުގައި މައިނު އަޅަން އުޅުނު އުޅަނދުތަކަކަށް ހަމަލާދީފަ އެވެ.
އިރާނުގެ ސަރުކާރާ ގުޅުންހުރި މީޑިއާތަކުން މި ހަމަލާތައް ސިފަކޮށްފައިވަނީ ހަނގުރާމަ ހުއްޓާލުމުގެ އެއްބަސްވުމާ ހިލާފަށް އެމެރިކާއިން ހިންގި އުދުވާނެއްގެ ގޮތުގަ އެވެ.
އެ ހަމަލާތަކާއި ގުޅިގެން އީރާނުގެ އީރާނުގެ ހަތިޔާރު އެޅި ސަފުތަކުގެ އިސް ތަރުޖަމާނު އަބުލްފަޟްލް ޝެކަރްޗީ ވިދާޅުވީ، އެ ގައުމާއި ދެކޮޅަށް ދޭ ކޮންމެ އައު އުދުވާނީ ހަމަލާއަކައި ދެކޮޅަށް ދޭނެ ރައްދު ކުރިއަށްވުރެ މާ ވަރުގަދަވާނެ ކަމަށާއި، އެ ރައްދު މުޅި ސަރަހައްދުން ބޭރަށް ފެތުރިގެންދާނެ ކަމަށެވެ.
ފެބްރުއަރީ 28 ވަނަ ދުވަހު އިސްރާއީލާއި އެެމެރިކާ ގުޅިގެން އީރާނަށް ދޭންފެށި ހަމަލާތަކުގައި އީރާނުގެ ކުރީގެ އެންމެ އިސް ލީޑަރު އާޔަތުﷲ އަލީ ޚާމަނާއީ ހިމެނޭހެން އެތައް ބަޔަކު ވަނީ އަވަހާރަވެފަ އެވެ.
ދެ ފަރާތުން ކުރި ހަނގުރާމަ އޭޕްރީލް އަށް ވަނަ ދުވަހުން ފެށިގެން އޮތީ މެދުކަނޑާލާފަ އެވެ. ހަނގުރާމަ މެދުކަނޑާލަން އޭޕްރީލް 8 ގައި ވީ އެއްބަސްވުމަށް ފަހު އަދިވެސް އެގޮތުގައި ތިބި ނަމަވެސް ދާއިމީ ސުލްހައިގެ އެއްބަސްވުމަކަށް ކުރަމުން އަންނަ މަސައްކަތް އަދި ކާމިޔާބުވާ ގޮތެއް ނުވެ އެވެ.
ފެބުރުވަރީ 28 ގައި އިޒްރާއީލު ރުއްސުމަށް ޓްރަމްޕް ފެށްޓެވި ހަނގުރާމަ ނިމުމަކަށް ގެނައުމުގެ ގޮތުން ވޮޝިންޓަނާއި ތެހްރާނުން މިހާރު ދަނީ މަޝްވަރާކުރަމުންނެވެ. މި ވަގުތު ދެ ފަރާތުގެ މެދުގައި އޮތް އެންމެ ބޮޑު ނުތަނަވަސްކަން ގުޅިފައިވަނީ އީރާނުން މުއްސަނދިކޮށް، ރައްކާކޮށްފައިހުރި ޔުރޭނިޔަމްއާ އެވެ.
ޓްރަމްޕް ކުރިން ވިދާޅުވަމުން ގެންދަވަނީ އެ ތަކެތި އެމެރިކާއިން އަތުލައިގަންނާނެ ކަމުގަ އެވެ. ނަމަވެސް، އެ ސިޔާސަތު ބަދަލުކުރައްވައި، ޓްރަމްޕް އެންމެ ފަހުން ވިދާޅުވީ، ދެ ފަރާތުން އެއްބަސްވާ ތަނަކަށް އެ ތަކެތި ގެންގޮސް، ނައްތައިލުމަށް އެއްބަސްވާން ވޮޝިންޓަނުން ތައްޔާރަށް އޮތް ކަމުގަ އެވެ.
