ads
ރައްޔިތުންގެ މަޖިލީހުގެ ނައިބުރައީސް އަހުމަދު ސަލީމް ޖަލްސާއެއްގެ ރިޔާސަތު ބަލަހައްޓަވަނީ - ފޮޓޯ: މަޖިލީހުގެ އިދާރާ
މި ސަރުކާރުގެ ފަސްއަހަރު ތެރޭގައި އުފެދޭނީ 40 ބިލިއަން ރުފިޔާގެ ދަރަނި: ސަލީމް
މި ސަރުކާރުގެ ފަސް އަހަރުގެ ދައުރު ނިމޭއިރު އެންމެ ބޮޑުވެގެން ވެސް އުފެދޭނީ 40 ބިލިއަން ރުފިޔާގެ ދަރަނި ކަމަށް ރައްޔިތުންގެ މަޖިލީހުގެ ނައިބު ރައީސް އަދި އޭދަފުށި ދާއިރާގެ މެންބަރު އަހުމަދު ސަލީމް ވިދާޅުވެއްޖެ އެވެ.
Advertisement

އަންނަ އަހަރަށް ލަފާކުރާ ދައުލަތުގެ ބަޖެޓުގެ ބަހުސްގައި ވާހަކަދައްކަވަމުން ބަޖެޓު ކޮމިޓީގެ މުގައްރިރުކަން ވެސް ކުރައްވާ ސަލީމް ވިދާޅުވީ، 2023 ވަނަ އަހަރު ނިމުނުއިރު ބަޖެޓު ދަރަނި ހުރީ ގާތްގަނޑަކަށް 24 ބިލިއަން ރުފިޔާގައި ކަމަށެވެ. އަދި މި ސަރުކާރުން ވެރިކަމާ ހަވާލުވިއިރު ހުރި ދަރަނިތައް ދައްކައިގެން، އަންނަ އަހަރާ ހަމައަށް ދާއިރު ދައުލަތުގެ ދަރަންޏަށް އިތުރުވާނީ ގާތްގަނޑަކަށް 30 ބިލިއަން ރުފިޔާ ކަމަށް އޭނާ ފާހަގަކުރެއްވި އެވެ.

ސަލީމް ވިދާޅުވީ ހަތަރު އަހަރު ދުވަހުން މި ސަރުކާރަށް އުފެއްދެނީ 30 ބިލިއަން ރުފިޔާ ކަމަށްވާއިރު، ފަސް ވަނަ އަހަރަށް ދާއިރު އެ އަދަދު އެންމެ ބޮޑުވެގެން ވެސް އަރާނީ 40 ބިލިއަނަށް ކަމަށެވެ. މިއީ ފާއިތުވެދިޔަ ދެ ސަރުކާރާ އަޅާބަލާއިރު ކުޑަ ދަރަންޏެއް ކަމަށާއި، ކޮންމެ ސަރުކާރަކުން ވެސް ދަރަނި އުފައްދަނީ ކުރީގެ ދަރަނިތައް ދައްކަމުން ކަމަށް އޭނާ ވިދާޅުވި އެވެ. އަދި އަންނަ އަހަރު އާމްދަނީގެ ގޮތުގައި 43 ބިލިއަން ރުފިޔާ ލިބޭނެ ކަމަށް ލަފާކޮށްފައިވާއިރު، ރިކަރަންޓު ހަރަދުތައް އާމްދަނީން ހަމަޖެއްސޭނެ ގޮތަށް ބަޖެޓު ފަރުމާކޮށްފައިވާކަން ވެސް ފާހަގަކުރެއްވި އެވެ.

"4 އަހަރު ދުވަހުން މި ސަރުކާރަށް އުފެއްދުނީ އެންމެ 30 ބިލިއަން ރުފިޔާއޭ. އޭގެ މާނައަކީ ފަސް ވަނަ އަހަރަކަށް ދިޔައީމާ އަންނާނީ އެންމެ ބޮޑުވެގެން ވެސް 40 ބިލިއަނަށް." ސަލީމް ވިދާޅުވިއެވެ.

މުސާރަ ދިނުމަށާއި އެހެނިހެން ކަންކަމަށް ދަރަނި ނެގުމަކީ ނުރައްކާތެރި ކަމެއްކަން ފާހަގަކުރައްވައި ސަލީމް ވިދާޅުވީ، ދަރަނި ނަގަން ޖެހޭނީ ލޮލަށް ފެންނަ ބޮޑެތި މަޝްރޫއުތަކަށް ކަމަށެވެ. އެފަދަ މަޝްރޫއުތަކަށް ނޫން ގޮތަކަށް ދަރަނި ނަގައިފިނަމަ އޭގެ ބޮޑު ގެއްލުމަކާ ކުރިމަތިލާން ޖެހޭނެ ކަމުގެ އިންޒާރު އޭނާ ދެއްވި އެވެ.

މީގެ އިތުރުން ދައުލަތުން ދޭ ސަބްސިޑީގެ ތަފުސީލު ރައްޔިތުންނަށް ސާފުކޮށްދިނުމުގެ މުހިންމުކަމަށް ވެސް ސަލީމް އަލިއަޅުއްވާލެއްވި އެވެ. އަންނަ އަހަރުގެ ބަޖެޓުގައި ހިލޭ އެހީ އާއި ސަބްސިޑީގެ ގޮތުގައި 13.9 ބިލިއަން ރުފިޔާ ހިމަނާފައިވާއިރު، މިއީ ދައުލަތަށް ލިބޭ އާމްދަނީގެ ގާތްގަނޑަކަށް ތިންބައިކުޅަ އެއްބައި ކަމަށް ވިދާޅުވި އެވެ. ކަރަންޓާއި ފެނުގެ ބިލުތަކާއި، ކާޑުގެ ބާވަތްތަކާއި ތެލަށް ދައުލަތުން ބޮޑު ސަބްސިޑީއެއް ދިން ނަމަވެސް، އެކަން ރައްޔިތުންނަށް އެނގޭނެ ގޮތަށް ކަމާބެހޭ އިދާރާތަކުން ހާމަކޮށްދޭން ޖެހޭ ކަމަށް އޭނާ ވިދާޅުވި އެވެ.

0%
ކަމުގޮސްފި
0%
އަޑުއެހިތާ މިހުރީ
0%
ސަތޭކައަކުން ސުމެއް
0%
ވަރަށް ސަލާމް
ކޮމެންޓްސް