އިއްޔެއާ ހަމައަށް ފިނޭންސް މިނިސްޓަރަކަށް ހުންނެވުމަށް ފަހު، ކުއްލިގޮތަކަށް ޒަމީރު ވަނީ އެ މަގާމުން އިސްތިއުފާ ދެއްވާފަ އެވެ. ސަރުކާރުގެ އިސް ތަރުޖަމާނު ހުސައިން ޝަރީފް (މުންދު) ވިދާޅުވި ގޮތުގައި، ޒަމީރު އިސްތިއުފާ ދެއްވީ ސިއްހީ ސަބަބުތަކަށްޓަކައެވެ.
މަގާމުން އިސްތިއުފާދެއްވިފަހުން އާއްމު ތަނެއްގައި ފުރަތަމަ ފަހަރަށް ވާހަކަދައްކަވަމުން ޕީއެންސީން މިރޭ ބޭއްވި އެ ޕާޓީގެ ހަރުގެ ޖަލްސާގައި ޒަމީރު ވިދާޅުވީ މީގެ ކުރިން 2018 ވަނަ އަހަރުގެ ރިޔާސީ އިންތިހާބަށްފަހު ޕާޓީއާ ދުރަށް ވަޑައިގެންނެވި ކަމަށެވެ. ސަބަބެއްކަމަށް ޒަމީރު ވިދާޅުވީ އާ ޒުވާން ބޭފުޅުންނަށް ޕާޓީގެ ކަންކަމުގައި އުޅުއްވުމުގެ ފުރުސަތު ދެއްވަން ބޭނުންފުޅުވުމެވެ.
މީގެއިތުރުން، މަގާމުން އިސްތިއުފާ ދެއްވި ނަމަވެސް، ޕާޓީއަށް ބޭނުންވާ ދުވަހު އަބަދުވެސް ހުންނާނެކަން ޒަމީރު ހާމަކުރެއްވި އެވެ.
ޒަމީރު ވަނީ 500 މިލިއަންގެ ސުކޫކު އަނބުރާ ދައްކައި، ރާއްޖެ އޮތް ދަރަނީގެ ހާލަތުން ސަލާމަތް ކުރުމުގައި ރައީސް އެޅުއްވި ދުރުވިސްނޭ ފިޔަވަޅުތަކަށް ތައުރީފު ކުރައްވައިފަ އެވެ.
މިގޮތުން، އެ ބޮޑު ދަރަނި ނުދެއްކޭނެ ކަމަށް ދުނިޔޭގެ މާލީ އިދާރާތަކުން ސުވާލު އުފައްދަމުން ދަނިކޮށް، އައިއެމްއެފްގެ ބެއިލްއައުޓަކަށް ނުދާން ނިންމަވައި، ރާއްޖެ ބަނގުރޫޓުވުމުން ސަލާމަތް ކޮށްދެއްވުމަކީ، ތާރީހީ ކާމިޔާބީއެއްގެ ގޮތުގައި ޒަމީރު ސިފަކުރެއްވި އެވެ.
