މި ފިލްމު ރިލީޒްކުރުމަށް ހަމަޖެހިފައިވަނީ މި ހިނގާ ޖުލައި މަހުގެ 31 ވަނަ ދުވަހުއެވެ. އިންޑިއާގެ ސެންސަރު ބޯޑު ކަމަށްވާ ސެންޓްރަލް ބޯޑް އޮފް ފިލްމް ސެޓިފިކޭޝަން (ސީބީއެފްސީ) އިން މި ފިލްމަށް ވަނީ ޔޫ/އޭ ސެޓްފިކެޓް ދޫކޮށްފަ އެވެ.
މި ސެޓްފިކެޓާއެކު، ބެލެނިވެރިންގެ އިރުޝާދާއެކު ކުޑަކުދިންނަށް ވެސް މި ފިލްމު ބެލުމުގެ ހުއްދަ ލިބިގެންދާނެއެވެ. ސެންސަރު ބޯޑުން މި ފިލްމަށް ހުއްދަ ދީފައިވަނީ ފިލްމަށް ބައެއް ކުދި ބަދަލުތަކެއް ގެނައުމަށް އެންގުމަށްފަހު، އެ ބަދަލުތައް ފިލްމަށް ގެނައުމުންނެވެ. މި ފިލްމަކީ ކުޑަކުއްޖަކާއި ކުއްތާއެއްގެ މެދުގައި އޮންނަ ގާތް އަދި ލޯބިވެތި ގުޅުމެއްގެ މައްޗަށް ބިނާކޮށް އުފައްދާފައިވާ އާއިލީ ފިލްމެކެވެ.
މީގެ ކުރިން ކާމިޔާބު ފިލްމު "އޯއެމްޖީ 2" ގެނެސްދިން ޑައިރެކްޓަރު އަމިތު ރާއީއާއެކު ޕަންކަޖް ޓްރިޕާތީ މަސައްކަތްކުރި ދެވަނަ ފިލްމަކީ ވެސް މިއީ އެވެ. "އޯ މައި ޑޯގް" ސިނަމާތަކަށް އަންނަން ތައްޔާރުވަމުންދާއިރު، މިއީ އާއިލާތަކަށް އެކުގައި ގޮސް ބަލާލެވޭނެ ފަދަ މުނިފޫހިފިލުވުމުގެ ރީތި މެސެޖުތަކެއް އެކުލެވޭ ފިލްމެއްގެ ގޮތުގައި ވަނީ ފާހަގަކުރެވިފަ އެވެ.
