ވެމްކޯގެ މެނޭޖިން ޑިރެކްޓަރު މުޖުތަބާ ޖަލީލު އެކްސްގައި ކުރެއްވި ޕޯސްޓެއްގައި ވިދާޅުވީ ހުޅުމާލޭގައި ދިމާވެފައިވާ ކުނީގެ މައްސަލަތަކަށް ހައްލު ހޯދައިދިނުމަށް އެޗްޑީސީން ހުޅުމާލެއިން ބިމެއް އިއްޔެ ވެމްކޯއަށް ދީފައިވާކަމަށެވެ. އަދި އެ ބިމަކީ އެކަށީގެންވާ ބިމެއްކަމަށާއި އެޗްޑީސީގެ އިސްނެގުމަށް ދިން މި ބިމުގެ ސަބަބުން ހުޅުމާލެއަށް ދިމާވެފައިވާ ކުނީގެ މައްސަލަތަކަށް އެކަށީގެންވާ ހައްލެއް ލިބިގެންދާނެކަމަށް މުޖްތަބާ ވިދާޅުވިއެވެ.
ތިލަފުށީ ކުނި ގޮނޑުގައި މިމަހުގެ 19 ވަނަ ދުވަހުގެ ރޭ ހިނގި އަލިފާނުގެ ހާދިސާގެ ސަބަބުން އެ ސައިޓުގެ ބައެއް ސަރަހައްދުތައް ވެމްކޯއިން ވަނީ ބަންދުކޮށްފައެވެ. އެއާއި އެކު މާލެ އާއި ހުޅުމާލެ އަދި ވިލިމާލޭގެ ޓްރާންސްފާ ފެސިލިޓީތަކުގެ އޮޕަރޭޝަނަށް ބުރޫއަރައި، ކުނި ބަލައިގަންނަ މިންވަރު ވަނީ މަދުކޮށްފައެވެ.
އެ އަލިފާނުގެ ހާދިސާގައި 50އެއްހާ ޓަނުގެ ކުނި އަނދާފައިވާކަމަށް ވެމްކޯއިން ވަނީ ބުނެފައެވެ. އަދި އެ ކުނިތައް އދ.ކުނބުރުދޫގައި ހިންގާ ވޭސްޓް މެނޭޖުމަންޓް ފެސިލިޓީއަށް ގެންދިއުމުގެ މަސައްކަތް އެ ކުންފުނިން އަންނަނީ ކުރަމުންނެވެ.
