ރޭގެ ވަގުތެއްގައި ހިނގި އެ ހާދިސާގައި ސިނަމާލެ ބްރިޖަށް އުރުނީ ކަސްޓަމްސްގެ ބެލުމުގެ ދަށުގައި އޮތް ތެޔޮ އުފުލާ ބާޖަކާއި ޓަގު ބޯޓެކެވެ. ސޯޝަލް މީޑިއާގައި ރޭ އާންމުވި ވީޑިއޯއަކުން، މި ދެ ބޯޓު އޮޔާ ގޮސް ބްރިޖުގައި ޖެހިފައިވާ ތަން ފެނެ އެވެ. މި ހާދިސާގައި ބްރިޖަށް މާބޮޑު ގެއްލުމެއް ނުލިބެ އެވެ.
އެމްއެންޑީއެފްއިން ދެންމެ ބުނީ، އެ ދެ ބޯޓު ބުރިޖުގެ ދަށުން އޮޔާ ގޮސް މާލެ އަތޮޅުން ބޭރަށްދާތީ، ބޯޓުގައި ތިބި ނުވަ ފަޅުވެރިން ސަލާމަތްކޮށްފައިވާ ކަމަށެެވެ.
މި ހާދިސާއާ ގުޅޭގޮތުން ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބް ވިދާޅުވީ މާލެ ކައިރީ އަޅާފައި އޮއްވާ އޮޔާސް ގޮސް، ސިނަމާލެ ބުރިޖަށް ތެޔޮ ބޯޓުތައް އުރުނު ހާދިސާގައި ބުރިޖުގެ ސްޓްރަކްޗާއަށް ގެއްލުމެއް ލިބިފައި ނެތް ނަމަވެސް ކުދި ކޫރު އެޅިފައިވާ ކަމަށެވެ. އެ ކޫރުތައް ބުރިޖު ބަލަހައްޓާ ސީއެޗްއީސީއިން ކަނޑައެޅިފައިވާ މިންގަނޑުތަކާ އެއްގޮތަށް މަރާމާތުކުރާނެ ކަމަށް މިނިސްޓަރު ވިދާޅުވެފައި ވެއެވެ.
