ހުޅުމާލޭގެ ފަރުކޮޅުފުށީގައި ބޭއްވި މި ހަފްލާ ޝަރަފުވެރިކޮށްދެއްވީ ފިނޭންސް މިނިސްޓަރު ވަޒީރު ހަސަން ޒަރީރު އެވެ. އަދި ހާއްސަ މެހެމާނެއްގެ ގޮތުގައި ހެލްތް މިނިސްޓަރު ގީލާ އަލީ ބައިވެރިވެވަޑައިގަތެވެ. މީގެއިތުރުން މިހަފްލާގައި އެމްޕީއެލްގެ ސީއީއޯ ކެޕްޓަން ހުސައިން ޝަފީގާއި ކުންފުނީގެ އެންމެ އިސްވެރިންނާއި ގިނަ އަދަދެއްގެ މުވައްޒަފުންވެސް ބައިވެރިވި އެވެ.
މި ރަސްމިއްޔާތުގައި ވާހަކަދައްކަވަމުން މިނިސްޓަރު ޒަރީރު ވަނީ ބަނދަރުގެ ޚިދުމަތް ފޯރުކޮށްދިނުމުގައި އެމްޕީއެލްގެ މުވައްޒަފުން ކުރަމުންދާ ބުރަ މަސައްކަތުގެ އަގު ވަޒަންކުރައްވައިފައެވެ.
މި ރަސްމިއްޔާތުގައި އެމްޕީއެލްގެ ސީއީއޯ ޝަފީގު ވިދާޅުވީ، މާލޭ ވިޔަފާރި ބަނދަރުގައި މި ވަގުތު ގިނަ ދަތިތަކެއް ހުރި ނަމަވެސް "ރޭގަނޑާއި ދުވާލު، ވާރޭގައާއި އަވީގައި، ޤައުމަށް ބޭނުންވާ ކާބޯތަކެއްޗާއި މުދާހުއްޓުމެއްނެތް ގޮތެއްގައި ފޯރުކޮށްދިނުމަށް" އެމްޕީއެލްގެ މުވައްޒަފުން ކުރަމުންދާ ބުރަ މަސައްކަތަށް ޝުުކުރު އަދާކުރާ ކަމަށެވެ.
މި ހަފްލާގައި ފާއިތުވި އަހަރު ހަތަރު ކެޓަގަރީއަކުން އެންމެ ރަނގަޅު މުވައްޒަފުންނަށް ވަނީ އެވޯޑް ދީފަ އެވެ. މީގެ އިތުރުން އިތުރުން 35 އަހަރަށް ވުރެ ދިގު މުއްދަތަކަށް ހިދުމަތްކޮށްފައިވާ މުވައްޒަފުންނަށް ހަނދާނީ ފިލާ ހަވާލުކުރެއްވުމާއި، ރިޓަޔާޑް މުވައްޒަފުންނަށް ހަނދާނީ ފިލާ ހަވާލުކުރެއްވުންވެސް މިހަފްލާގައި ކުރިއަށް ގެންގޮސްފައި ވެ އެވެ.
އަދި، އުމުރުން 20 އަހަރުގައި ޤުރުއާން ހިތުދަސްކޮށް، ޙާފިޡުކަމުގެ ސަަނަދު ހާސިލްކޮށްފައިވާތީ، އެކަމުގެ އަގުވަޒަންކޮށް، ހިތްވަރު ދިނުމުގެ ގޮތުން އަލްހާފިޒް ހުސައިން ޒައިން އަލީ އަށް ވަނީ ހާއްސަ އެވޯޑެއް ދީފަ އެވެ.
