Advertisement

މި މައްސަލަ ސުޕްރީމް ކޯޓަށް ހުށަހެޅިކަން ހާމަކުރައްވާފައިވަނީ ގާނޫނީ ވަކީލް އަލީ ހުސައިން، އެކްސް މެދުވެރިކޮށް އާންމުކުރެއްވި ބަޔާނެއްގަ އެވެ.

ރަސްމާލެ ތަރައްގީ ކުރަން ނިންމާފައި ވަނީ ފަތުރުވެރިކަމުގެ މަންޒިލެއްގެ ގޮތުގަ އެވެ. އެތަން ތަރައްގީ ކުރަނީ ބިދޭސީންނަށް އެތަނުގައި ދިގު މުއްދަތަކަށް ދިރިއުޅެވޭނެ ގޮތަށެވެ. ރަސްމާލޭގައި ބިނާ ކުރާ އެޕާޓްމަންޓުތަކާއި ވިލާތައް ބިދޭސީންނަށް ވިއްކަން އީގަލް ހިލްސް އިން މިހާރު ވެސް ވަނީ ހުޅުވާލައިފަ އެވެ. 

މި މަސްރޫއުއާއި ގުޅިގެން ދިވެހިންގެ މެދުގައި ބޮޑު ބަހުސެއް ފެށިފައިވަނިކޮށް މައްސަލަ ކޯޓަށް ހުށަހެޅުމާ ގުޅޭގޮތުން އާންމު ކުރެއްވި ނޫސްބަޔާނެއްގައި ގާނޫނީ ވަކީލު އަލީ ހުސައިން ވިދާޅުވީ، ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓްރީ އާއި ޔޫއޭއީގެ އީގަލް ހިލްސްއާ ދެމެދު މިދިޔަ ހަފްތާ ސޮއިކުރި "ކޮމާޝަލް ޓާމްސް އެގްރީމަންޓް"ގެ ގާނޫނީ ސައްހަކަމާ މެދު ސުވާލު އުފައްދައި އެ މައްސަލަ ކޯޓަށް ހުށަހަޅާފައިވާ ކަމަށެވެ. 

މި މައްސަލައިގައި ސުޕްރީމް ކޯޓުން ވަކި ގޮތެއް ނިންމަންދެން، އެއްބަސްވުމަށް އަމަލުކުރުން ވަގުތީ ގޮތުން ފަސްކުރުމުގެ އަމުރަކަށް (އިންޓަރިމް އޯޑަރަކަށް) ވެސް ވަނީ އެދިފައެވެ. މި ވަގުތީ އަމުރަށް އެދިފައިވަނީ ތިންވަނަ ފަރާތްތަކުގެ ހައްގުތަކެއް އުފެދި، އޭގެ ސަބަބުން ދައުލަތަށް އިއާދަނުކުރެވޭ ފަދަ ބޮޑެތި މާލީ އަދި ގާނޫނީ ބުރަތަކެއް އުފުލަން ޖެހިދާނެތީ އެކަން ހުއްޓުވުމުގެ މަގުސަދުގައެވެ.

އަލީ ހުސެއިން ވިދާޅުވީ ޤާނޫނު އަސާސީ އާއި ޚިލާފަށް ބޭރުގެ ކުންފުންޏަކަށް ރަސްމާލެއިން 500 ހެކްޓަރުގެ ބިން ދިނުމަށް ސަރުކާރުން ނިންމާފައިވާތީ އެކަން ހުއްޓުވުމަށް ސުޕްރީމް ކޯޓަށް މައްސަލައެއް ހުށަހަޅާފައިވާ ކަމަށެވެ.

އެގޮތުން ރަސްމާލޭން 500 ހެކްޓަރުގެ ބިން އީގަލް ހިލްސް ކުންފުންޏަށް 99 އަހަރަށް ދޭން ސަރުކާރުން ނިންމާފައި ވަނީ ގާނޫނުއަސާސީގެ 250 ވަނަ މާއްދާއާ ހިލާފަށް ކަމަށް އެ މައްސަލައިގައި ބުނެފައިވެ އެވެ. އެ މައްސަލައިގައި ވަނީ ވަކި ގޮތެއް ސުޕްރީމް ކޯޓުން ނިންމުމުގެ ކުރިން، އީގަލް ހިލްސްއާ ދެމެދު ވެފައިވާ އެއްބަސްވުން މަޑުޖައްސައިލުމުގެ އަމުރަކަށް އެދިފަ އެވެ.

މަޝްރޫއުގެ މުހިންމު ތަފްސީލުތައް:

• ތަރައްގީކުރާ ތަން: ވެރިރަށް މާލެއިން ފުރައިގެން ލޯންޗުގައި ގާތްގަނޑަކަށް 17 މިނެޓުން ދެވޭ ފުށިދިއްގަރު ފަޅުގައި ހިއްކަމުންދާ "ރަސްމާލެ" ސިޓީގައެވެ.
• ހިމެނޭ ބައިތައް: ބައިނަލްއަގުވާމީ ފެންވަރުގެ ހޮޓާތަކާއި ރިސޯޓުތައް، ޕްރީމިއަމް އަދި ބްރޭންޑެޑް ރެޒިޑެންސްތައް، ދުނިޔޭގެ ފެންވަރުގެ މެރީނާއެއް، ވޯޓާފްރަންޓް ޕްރޮމެނާޑްތައް، ރެސްޓޯރެންޓްތަކާއި ފިހާރަތައް، އަދި މުނިފޫހިފިލުވުމާއި ދުޅަހެޔޮކަމުގެ މަރުކަޒުތައް (ވެލްނެސް ސެންޓަރުތައް).
• އިންވެސްޓްމަންޓް: އެކި ފިޔަވަހިތަކަށް ބަހާލައިގެން ކުރިއަށްގެންދާ މި މަޝްރޫއުގެ ޖުމްލަ އިންވެސްޓްމަންޓް 20 ބިލިއަން ޑޮލަރަށް އަރާނެ ކަމަށް އަންދާޒާކުރެވެއެވެ.
• އިގްތިސާދީ ފައިދާ: މި މަޝްރޫއުގެ ދަށުން ރާއްޖެއަށް 30 ބިލިއަން ޑޮލަރަށް ވުރެ ގިނަ ބޭރުގެ އިންވެސްޓްމަންޓް ލިބޭނެ ކަމަށް ބެލެވޭއިރު، އޭގެ ތެރޭގައި 18 ބިލިއަން ޑޮލަރުގެ ނެޓް އިންވެސްޓްމަންޓް ހިމެނެއެވެ. އަދި ސީދާ އަދި ނުސީދާ ގޮތުން 54،000 އަށް ވުރެ ގިނަ ވަޒީފާ އުފެދިގެންދާނެއެވެ.

މި މަޝްރޫއުގެ އަމަލީ މަސައްކަތް ފެށޭނެ ވަކި ތާރީހެއް އަދި ހާމައެއް ނުވެ އެވެ.

މި މަޝްރޫއުގެ ކޮމާޝަލް ޓާމްސް އެއްބަސްވުމުގައި މިދިޔަ ހަފްތާ ސޮއިކޮށްފައިވާއިރު މި މަޝްރޫއާ ގުޅިގެން ސިޔާސީ ބައެއް ފަރާތްތަކުން އަންނަނީ ކަންބޮޑުވުން ފާޅުކުރަމުންނެވެ. މިއީ ރަސްމާލޭގެ ބިން "ވިއްކާލުން" ކަމަށް ބުނެ އެއްބަސްވުން އާންމު ކުރުމަށް ވެސް އަންނަނީ ގޮވާލަމުންނެވެ.