އެ ޖަމްއިއްޔާއިން ވަނީ މާބަނޑުއިރު ހަކުރު މަތިވުމަކީ ދުނިޔޭގެ ފެންވަރުގައި ސިއްހީ ބޮޑެތި ނުރައްކާތަކެއް ކުރިމަތިކުރުވާ ކަމެއްކަން ހާމަކޮށްފައެވެ.
ޑަބްލިއުއެޗްއޯއިން ވަނީ މާބަނޑުއިރު ޖެހޭ ހަކުރުބަލި (ޖެސްޓޭޝަނަލް ޑައިބެޓީސް) އާއި މާބަނޑު ދުވަސްވަރު ލޭގައި ހަކުރު މަތިވުން (ހައިޕާގްލައިސީމިއާ) ދެނެގަތުމަށް ބޭނުންކުރާ ސްކްރީނިންގް އަދި ޑައިގްނޯސްޓިކް ކްލިނިކަލް އުސޫލުތައް މުރާޖައާކޮށް އަދާހަމަކުރުމަށްޓަކައި ދުނިޔޭގެ ފެންވަރުގެ މާހިރުންގެ ކޮމިޓީއެއް އެކުލަވާލާފަ އެވެ. މި ކޮމިޓީގެ މައިގަނޑު ބޭނުމަކީ ބަލި ދެނެގަނެ، ފަރުވާ ދިނުމުގެ މިންގަނޑުތައް އާކުރުމެވެ.
އެ ޖަމްއިއްޔާއިން ހާމަކުރި މައުލޫމާތުތަކަށް ބަލާއިރު، މުޅި ދުނިޔޭގައި މާބަނޑުވާ ކޮންމެ 6 އަންހެނުންގެ ތެރެއިން 1 އަންހެނަކަށް މާބަނޑު ދުވަސްވަރު ލޭގައި ހަކުރު މަތިވުމުގެ މައްސަލައާ ކުރިމަތިލާންޖެހެ އެވެ. މިއީ ނިސްބަތުން މަތީ އަދަދެކެވެ.
މާބަނޑުއިރު ލޭގައި ހަކުރު މަތިވުމުގެ ސަބަބުން މައިމީހާއަށް ތަފާތު ސިއްހީ ނުރައްކާތަކާއި ކޮމްޕްލިކޭޝަންތައް ކުރިމަތިވުމުގެ ފުރުސަތު ބޮޑުވެގެންދެ އެވެ. މީގެ އިތުރުން ވިހެއުމުގެ ތެރޭގައްޔާއި ވިހެއުމާ ގުޅިގެން ދިމާވާ ނޭދެވޭ ނަތީޖާތަކާއި އުނދަގޫތައް އިތުރުވެގެންދާކަމަށް ޑަބްލިއުއެޗްއޯއިން ވަނީ އިންޒާރުދީފަ އެވެ.
