ރައްޔިތުން މަޖިލީހުން މިއަދު ވަނީ މެމްބަރުންގެ މާލީ ބަޔާންތައް އާއްމުކޮށްފައެވެ.
އެ މާލީ ބަޔާްތައް ދައްކާގޮތުން މަޖިލީހުގެ ރައީސް އަބްދުއްރަހީމް އަބްދުﷲ އަށް ހެޔޮއެދޭ ފަރާތަކުން ވަނީ އޭނާއަށް 120،191.76 ރުފިޔާ ދީފައެވެ. އެ މީހަކު މިފައިސާ އަބްދުއްރަހީމަށް ދީފައިވަނީ ދަތުރުރުފަތުރުކުރުމަށާއި ކްރެޑިޓް ކާޑްތަކަށް ފައިސާ ދެއްކުމަށެވެ.
އަބްދުއްރަހީމްގެ މާލީ ބަޔާނުގައި ވާގޮތުން މިދިޔަ އަހަރުގެ މޭ 28 އިން ފެށިގެން މިދިޔަ މޭމަހުގެ 27ގެ ނިޔަލަށް އޭނާއަށް މަޖީލީހުން މުސާރައާއި އިނާޔަޔްތަކުގެ ގޮތުގައި 599961.52 ރުފިޔާ ވަނީ ލިބިފަ އެވެ. އަދި މުދާ އުފުލާ ބޯޓެއްކަމަށްވާ އަރަފާ އެކްސްޕްރެސް ކުއްޔަށް ދީގެން އަހަރެއްގެ ތެރޭގއި ވަނީ 480،000 ރުފިޔާ ލިބިފަ އެވެ.
އަބްދުއްރަހީމްގެ ހުރި މިލްކިއްޔާތުގައި ހުރީ ރެހެންދި ފްލެޓްގައި ހުރި 3 ކޮޓަރީގެ އެޕާޓްމަންޓަކާއި އަމިއްލަ އުފަން ރަށްކަމަށްވާ ލ. ފޮނަދޫގައި ހުރި އަރާއިރު ގެއެވެ. މިތަނުން ރެހެންދި ފްލެޓްގެ އަގަކީ 4.5 މިލިއަނަށްވާއިރު އެ ފައިސާ ދައްކާފައިވަނީ އަމިއްލަ މަސައްކަތުން ހޯދި ފައިސާއާއި ހެޔޮ އެދޭ ފަރާތްތަކުން ހަދިޔާގެ ގޮތުަގއި ދިން ފައިސާއިންކަމަށް އަބްދުއްރަހީމްގެ މާލީ ބަޔާނުގައި ވެއެވެ.
