ހައްޖު ކޯޕަރޭޝަނުން ރިއަލް އެސްޓޭޓް މަޝްރޫއެއް އިއުލާންކުރީ 2024ގެ ކުރީކޮޅު އެވެ. އަދި ހަމަ އެ އަހަރު އެކަމަށް ބޭނުންވާ ބިމެއް ހުޅުމާލޭގެ ދެ ވަނަ ފިޔަވަހިން ވަނީ ގަނެފަ އެވެ.
"ނިއަމް ރެސިޑެންސް" ގެ ނަމުގައި ކުރިއަށްގެންދާ މި މަޝްރޫއުގެ ޑިޒައިން އަދި ކޮންސަލްޓެންސީ މަސައްކަތްތައް ކުރަނީ ފަހި ދިރިއުޅުން ކޯޕަރޭޝަން (އެފްޑީސީ) އިންނެވެ. މިދިޔަ އަހަރުގެ ސެޕްޓެމްބަރު މަހު ވެވުނު އެއްބަސްވުމުގެ ދަށުން، އެފްޑީސީން ދަނީ މި މަޝްރޫއަށް ބޭނުންވާ ކުރެހުންތައް ފޯރުކޮށްދިނުމުގެ މަސައްކަތް ކުރަމުންނެވެ.
ނަމަވެސް ހައްޖު ކޯޕަރޭޝަނުން ރޭ ނެރުނު ނޫސްބަޔާނެއްގައި ނިއާމް ރެސިޑެންސްގެ އެޕާޓްމަންޓުތައް މުވައްޒަފުންނަށް ވިއްކަން ވެފައިވާ އެއްބަސްވުން ބާތިލުކުރަން ނިންމިކަން ވަނީ ހާމަކޮށްފަ އެވެ.
އެ ބަޔާނުގައި ހައްޖު ކޯޕަރޭޝަނުން ބުނީ ނިއާމް ރެސިޑެންސް މަޝްރޫއުގައި ތަރައްގީކުރާ ކޮންމެ އެޕާޓްމަންޓް ޔުނިޓަކުން ކުންފުންޏަށް އެންމެ ބޮޑު ފައިދާއެއް ލިބޭހެން އެ މަޝްރޫއު ކުރިއަށްގެންދިއުމަށްޓަކައި ޔުނިޓުތަކުގެ އަގު ކަނޑައެޅުމާއި ޔުނިޓުތައް ވިއްކަން އާންމުކޮށް ހުޅުވާލުމުގެ މަސައްކަތް ކުރަމުން އަންނަ ކަމަށެވެ.
ނިއަމް ރެސިޑެންސްގެ އެޕާޓްމަންޓް ވިއްކުމުގެ މުއާމަލާތްތައް ބާތިލްކުރިއިރު، މުވައްޒަފުން އަންނަނީ އެޕާޓްމަންޓަށް ބުކިން ފީ އަދި މަހުން މަހަށް ބަހާލައިގެން ފައިސާ ވެސް ދައްކަމުންނެވެ.
