މި މަޝްރޫއު އަކީ މަގުމަތީގައި އުޅޭ ބުޅަލުގެ އާބާދީ އިތުރުވަމުންދާ މައްސަލައަށް ހައްލެއް ހޯދުމަށާއި، އާންމު ސަރަހައްދުތަކުގެ ސާފުތާހިރުކަން ދެމެހެއްޓުމަށްޓަކައި މިނިސްޓްރީ އޮފް ފިޝަރީޒް، އެގްރިކަލްޗާ އެންޑް އޯޝަން ރިސޯސަސް އާއި، ޖަނަވާރުންގެ ހިމާޔަތުގައި މަސައްކަތްކުރާ ފަރާތްތަކާއި، އިޖުތިމާއީ ޖަމިއްޔާތަކުގެ އިތުރުން ކަމާބެހޭ މުހިންމު ފަރާތްތައް ގުޅިގެން ކުރިއަށްގެންދާ ގައުމީ ފެންވަރުގެ މަޝްރޫެއްކަމަށް ސަރުކާރުން ބުނެ އެވެ.
"ބައޯކަލޯ" މި ނަމަކީ ދިވެހި ފޯކްލޯ ނުވަތަ ކާބަފައިންގެ ވާހަކަތަކުގައި ބިރުވެރިކަމާ ގުޅުވައިގެން ބޭނުންކުރާ ނަމެއް ނަމަވެސް، މި މަޝްރޫއުގެ ތެރެއިން އެ ނަމަށް އައު މާނައެއް ދީފައިވާކަމަށް ފިޝަރީޒް މިނިސްޓްރީން ބުނެ އެވެ. އެއީ އޯގާތެރިކަމާއި، ޒިންމާދާރުކަމާއި، ރައްކާތެރިކަން އަދި މުޖުތަމައަށް ފައިދާހުރި ހަރަކާތެއްގެ ރަމްޒެއްގެ ގޮތުގައިކަމަށްވެސް މިނިސްޓްރީން ބުނެ އެވެ.
މި މަޝްރޫއުގެ ފުރަތަމަ މަރުހަލާ (ޕައިލެޓް ޕްރޮޖެކްޓް) ހުޅުމާލޭގައި ކުރިއަށްގެންދާއިރު، މީގެ މައިގަނޑު މަގުސަދަކީ މުޅި ރާއްޖެއަށް ފުޅާކުރެވޭނެ ފަދަ ނަމޫނާ ނިޒާމެއް ބިނާކުރުންކަމަށްވެސް މިނިސްޓްރީން ބުނެ އެވެ.
ހުޅުމާލޭގައި ކުރިއަށްގެންދާ މި ޕައިލެޓް މަޝްރޫއުގެ ދަށުން، "ޓްރެޕް-ނިއުޓާ-ރިޓާން" (ޓީ.އެން.އާރް) ޕްރޮގްރާމެއް މެދުވެރިކޮށް ބުޅާ ދަރިމައިވުން ހުއްޓުވުމުގެ މަސައްކަތް ކުރިއަށްދާނެކަމަށް މިނިސްޓްރީން ބުނެ އެވެ. މީގެ އިތުރުން، ވެޓެރިނަރީ ފަރުވާ ދިނުމާއި، ޒިންމާދާރުކަމާއެކު ކާނާ ދިނުމާއި، ބުޅާ އެޑޮޕްޓްކުރުމަށް ބާރުއެޅުމާއި، މަގުމަތީގެ ސަލާމަތްތެރިކަމުގެ އިތުރުން އިޖުތިމާއީ ހޭލުންތެރިކަން އިތުރުކުރުމުގެ ހަރަކާތްތައްވެސް ހިމެނޭކަމަށް މިނިސްޓްރީން ބުނެ އެވެ.
"ޕްރޮޖެކްޓް ބައުކަލޯ" އަކީ އެ ގައުމީ އަމާޒުތައް އަމަލީ ސިފައެއްގައި މުޖުތަމައުގެ ފެންވަރުގައި ތަންފީޒުކުރުމަށްޓަކައި އެކި އިދާރާތައް ގުޅިގެން ހިންގާ ޕްރޮގްރާމެއްކަމަށް މިނިސްޓްރީން ބުނެ އެވެ.
މި މަޝްރޫއުގެ މައިގަނޑު ހަ އަސާސަކީ:
މި މަޝްރޫއުގައި މިނިސްޓްރީ އޮފް ފިޝަރީޒްގެ އިތުރުން ހައުސިންގ ޑިވެލޮޕްމަންޓް ކޯޕަރޭޝަން (އެޗް.ޑީ.ސީ)، އަމިއްލަ ޖަމިއްޔާތައް، ވެޓެރިނަރީ ކްލިނިކްތައް، އެނިމަލް ޝެލްޓަރތައް، ސްކައުޓް އަދި ގާލް ގައިޑް، ޕީ.އެސް.އެމް އަދި އެހެނިހެން ބައިވެރިން ހިމެނެއެވެ. މަޝްރޫއު ކުރިއަށްދާ ވަރަކަށް، މި ތަސައްވުރުގައި ބައިވެރިވާން ބޭނުންވާ އިތުރު ފަރާތްތަކަށް ފުރުސަތު ހުޅުވާލެވޭނެއެވެ.
ކުރިއަށް އޮތް އަހަރުގެ ތެރޭގައި މި ޕައިލެޓް މަޝްރޫއުގެ ދަށުން އަމަލީ ގިނަ ހަރަކާތްތަކެއް ހިންގުމަށް ވަނީ ރޭވިފައެވެ. އޭގެ ތެރޭގައި ޓީ.އެން.އާރް ޕްރޮގްރާމްތަކާއި، "ކެޓް ސޭފް ޕާކް" ތައް ގާއިމުކުރުމާއި، ކުޑަކުދިންނާއި ޒުވާނުންނަށް ހާއްސަ ހަރަކާތްތަކުގެ އިތުރުން އާންމު ހޭލުންތެރިކަން އިތުރުކުރުމުގެ މަސައްކަތްތައް ހިމެނެއެވެ. މި މަޝްރޫއުގެ ކާމިޔާބީތަކާއި ދަސްވި ފިލާވަޅުތައް ދައްކާލުމަށްޓަކައި 4 އޮކްޓޯބަރު 2027 ގައި ދުނިޔޭގެ ޖަނަވާރުންގެ ދުވަހާ ގުޅުވައިގެން ބޮޑު ހަރަކާތެއް ބޭއްވުމަށް ވަނީ އަމާޒު ހިފާފައެވެ.
