ސްކޫލް ކުދިންނަށް ހާއްސަ ބަހަކާއި ހުޅުމާލެއިން ވެލާނާގެއަށް އަންނަ މީހުން އުފުލަން ގްރީން ޒޯންތަކަށް ދަތުރުކުރަން ވަކި ބަހެއް ތައާރަފުކުރުމަށް ވިސްނަމުން އަންނަކަމަށް ޓްރާންސްޕޯޓް މިނިސްޓަރު މުހައްމަދު ސައީދު ވިދާޅުވެއްޖެ އެވެ.
Advertisement
ދައުލަތުގެ މީޑިއާއިން ގެނެސްދޭ އަހާ ފޯރަމްގައި ވާހަކަ ދައްކަވަމުން މިނިސްޓަރު ސައީދު ވިދާޅުވީ ޓްރެފިކް ބާރުބޮޑުވާ ވަގުތުތަކަށް ހާއްސަކޮށްގެން ދަތުރުކުރާނެ ބަސްތަކެއް ތައާރަފުކުރަން ވިސްނަމުން އަންނަކަމަށެވެ. އެގޮތުން ސްކޫލް ކުދިންނަށް ހާއްސަކޮށްގެެން "ސްކޫލް ފްރެންޑްލީ" ބަސްތަކެއް ތައާރަފުކުރުމުގެ މަސައްކަތް ކުރަމުން އަންނަކަމަށެވެ.
" އެކިއެކި ސްކޫލުތަކާއި ބެލެނިވެރިންނާއި ވާހަކަދައްކައިގެން އަޅުގަނޑުމެން މި ގަސްތުކުރަނީ ސްކޫލުތަކަށް ދަތުރުކުރާ ސްކޫލު ފްރެންޑްލީ ބަސްތަކެއް ހަމަ މި ދަންނަވާހެން ފޭސް 2 އަކާއި ފޭސް 1 އަކުން މާލެއާ ދޭތެރޭގެ ދަތުރުތަކެއް ފައްޓަން އެނގޭތޯ." ސައީދު ވިދާޅުވި އެވެ.
އޭގެއިތުރުން ހުޅުމާލެއިން މާލެެއަށް ވަޒީފާއަށް އަންނަ ފަރާތްތަކަށް ގްރީން ޒޯނަށް ދަތުރުކުރާނެ ބަހެއް ތައާރަފުކުރުމުގެ މަސަައްކަތްވެސް ކުރަމުން އަންނަކަމަށް ސައީދު ވިދާޅުވި އެވެ.
"ހުޅުމާލޭގެ ހިޔާ ޓަވަރު ސަރަހައްދުން ދެވަނަ ފިޔަވައްސާއި ހުޅުމާލޭން މާލެއަށް މަސައްކަތަށް ވަޑައިގަންނަވާ ބޭފުޅުންނާއި ގިނައީ އެބޭފުޅުން އަދި ބާރު ބޮޑުވާ ވަގުތުތަކުގައި މާލެއަށް ނުވަތަ ހުޅުމާލެއަށް އެކިއެކި ބޭނުންތަކަށް ވަޑައިގަންނަވާ ބޭފުޅުންނަށް އަޅުގަނޑުމެންގެ މި ޕްލޭންގެ ތެރޭގައި ހިމެނޭނެ ފޭސް 2 އަކުން ވެލާނާގެ ސަރަަހަށްދަށް، ގްރީން ޒޯންއަށް ވަކި ގަޑިތަކެއްގައި ދަތުރުކުރާ ބަސްތަކެެއް ތައާރަފުކުރުން ވެސް،" ސައީދު ވިދާޅުވި އެވެ.
މިނިސްޓަރު ސައީދު ވިދާޅުވީ މާލެ ވެހިކަލްތަކުން ފުނިޖެހިފައިވާކަމަށެވެ. އެގޮތުން މާލޭގެ މަގުތަކުގެ 82 އިންސައްތަ މިހާރު އޮތީ ވެހިކަލްތަކުން ފުރިފައިކަން މިނިސްޓަރު ފާހަގަކުރެއްވި އެވެ. މާލެ ސަރަހައްދަށް 130،806 އަށް ވުރެ ގިނަ ވެހިކަލް ރަޖިސްޓްރީ ކޮށްފައިވާއިރު އޭގެ ތެރޭގައި 14،911 ކާރާއި 115،895 ސައިކަލު ހިމެނޭކަމަށްވެސް ސައީދު ވިދާޅުވި އެވެ.
