ޕެރިހުގެ ނެންޓެރޭގައި ހުންނަ ޕްލެނިޓިއުޑް އެރީނާގައި ކުރިއަށްދިޔަ މި ޝޯގައި، އޭނާ ފޯރީގައި ނަށަމުން ދަނިކޮށް ބޫޓުގެ ހީލް ފަޓުލޫނުގައި އަޅައިގަނެ ސްޓޭޖުމައްޗަށް ވެއްޓުނީ ކުއްލިއަކަށެވެ. ނަމަވެސް އެއްވެސް ހާސްކަމެއް ނެތި އޭނާ ވަގުތުން ތެދުވެ، ބެލުންތެރިންނަށް ހިނިތުންވުމާއެކު އިޝާރާތްކޮށްލުމުން މުޅި އެރީނާ އެއްއަޑަކުން އޭނާއަށް ސަނާ ކިޔަން ފެށިއެވެ.
މަންޒަރު ދުށް ފަރާތްތަކުން ބުނާ ގޮތުގައި، ސެލީން ޑިއޯން ވެއްޓުނު ވަގުތު އޭނާގެ އެއް އަތުން ސްޓޭޖުގައި ވިއްދާލިއިރު އަނެއް އަތުން މައިކްރޯފޯނުގައި ވަރަށް ބާރަށް ހިފަހައްޓައިގެން އިނެވެ. އަދި އެއްވެސް މީހެއްގެ އެހީތެރިކަމަކާ ނުލައި، ސިކުންތުކޮޅެއްގެ ތެރޭގައި އަމިއްލައަށް ތެދުވެ ލަވަކިޔުން މެދުކަނޑާނުލައި ކުރިއަށް ގެންދިޔައެވެ. ބެލުންތެރިން ކަންބޮޑުވެދާނެތީ އޭނާ ވަނީ ލަވަކިޔަމުން ލޮލުން އިޝާރާތްކޮށް، ހުރިހާ ކަމެއް ވެސް ރަނގަޅު ކަމަށް ބުނެ ހިނިތުންވެލާފަ އެވެ.
މިއީ ނާރުގެ ނުރައްކާތެރި ބައްޔެއް ކަމަށްވާ ސްޓިފް-ޕާސަން ސިންޑްރޯމް (އެސްޕީއެސް) ތަހައްމަލުކުރަމުން އަންނަ އުމުރުން 58 އަހަރުގެ ސެލީން ޑިއޯން، ހަ އަހަރަށް ވުރެ ގިނަ ދުވަހުގެ މެދުކެނޑުމަކަށް ފަހު ސްޓޭޖަށް އެނބުރި އައިސް ދެމުންދާ ހާއްސަ ޝޯތަކުގެ ތެރެއިން ހިނގި ހާދިސާއެކެވެ. އޭނާގެ ހަށިގަނޑުގެ މަސްތައް ގަނޑުވާ މި ބައްޔާ ހަނގުރާމަކުރުމަށްފަހު އެނބުރި ސްޓޭޖަށް އައިސް، މިފަދަ ހާދިސާއަކުން އެހާ އަވަހަށް އަރައިގަނެ ހަރަކާތްތެރިކަން ދެއްކުމަކީ އޭނާގެ ސިއްހަތު ވަރަށް ބޮޑަށް ރަނގަޅުވަމުން އަންނަ ކަމުގެ އަލާމާތެއް ކަމަށް ސަޕޯޓަރުން ބުނެ އެވެ.
މި ހާދިސާ ހިނގި ނަމަވެސް، ދެ ގަޑިއިރަށް ދެމިގެންދިޔަ މި ފުރިހަމަ ޝޯގައި އޭނާގެ މަޝްހޫރު ލަވަތައް ކަމަށްވާ "ބިކޯޒް ޔޫ ލަވްޑް މީ" އަދި "މައި ހާޓް ވިލް ގޯ އޮން" ހިމެނޭހެން ގިނަ ލަވަތަކެއް މޮޅު އަޑަކުން ހުށަހަޅައިދިނެވެ. ކޮންސެޓުގައި ބައިވެރިވި މީހުން ފާހަގަކުރި ގޮތުގައި، ވެއްޓުމުގެ ސަބަބުން އޭނާގެ އަޑަކަށް އަދި ހަކަތައަކަށް ވެސް އެއްވެސް ބަދަލެއް ނާދެ އެވެ.
ސޯޝަލް މީޑިއާގައި މި މަންޒަރު ފެންނަ ވީޑިއޯތައް ވައިރަލްވެފައިވާއިރު، މުޅި ދުނިޔޭގެ އެކި ކަންކޮޅުތަކުން އަންނަނީ އޭނާގެ ޕްރޮފެޝަނަލް މިޒާޖަށާއި ހިތްވަރަށް ތައުރީފު ކުރަމުންނެވެ. އާންމުން ބުނާ ގޮތުގައި، ސްޓޭޖުމަތީގައި ދިމާވި މި ހާދިސާއަކީ ލަދުވެތި ވަގުތަކަށް ހެދުމުގެ ބަދަލުގައި، ސެލީން ޑިއޯން ދައްކުވައިދިނީ ހަގީގީ ފަންނާނެއްގެ ފުރިހަމަ ކުޅަދާނަކަމާއި ހިތްވަރެވެ.
