މި ހަރަކާތް އިފްތިތާހު ކޮށްދެއްވަމުން ކުރީގެ ހޯމް މިނިސްޓަރު އިމްރާނު އަބްދުﷲ ވިދާޅުވީ "ދިވެހިންގެ ބިން ދިވެހިންނަށް" ހަރަކާތަކީ ރަސްމާލެ ވިއްކާލުމާ ދެކޮޅަށް ވަކިވަކިން އިވެމުން އައި އަޑުތައް އެއްކޮށްލައިގެން ފެށި މަސައްކަތެއް ކަމަށާއި ސަރުކާރުން މިކަން ހުއްޓާލުމާ ހަމައަށް މި ހަރަކާތް ވަރުގަދަކަމާއެކު ދެމި އޮންނާނެ ކަމަށެވެ.
ޒަޔަނިސްޓުންނާއި އެ މީހުންނަށް ބާރުދޭ ފަރާތްތަކަށް ރާއްޖޭގެ ބިމުން އެންމެ ވެލިފުކެެއް ވެސް ދޫކޮށްލެވިގެން ނުވާނެ ކަމަށާއި އަދި ރާއްޖޭގެ ބިމާއި ކަނޑުފަޅު ދޫކުރެވެނީ ރައްޔިތުންގެ ބައިވެރިވުމާއި ހިޔާލާއި މަޝްވަރާ ހޯދައިގެން ރައްޔިތުންނަށް މަންފާ ކުރާ ގޮތެއްގެ މަތިން ކަމަށް އިމްރާން ވިދާޅުވި އެވެ. އެކަމާ ދެކޮޅަށް ތެދުވާން ނިންމީ އެ ހަމަތަކާ ދެކޮޅަށް އެ މަޝްރޫއު ހިންގަވަން ނިންމާފައިވާތީ ކަމަށްވެސް އިމްރާން ވިދާޅުވި އެވެ.
ރަސްމާލެ މަޝްރޫއާ ގުޅޭގޮތުން ސަރުކާރުން އަމަލުކުރަމުންދާ ގޮތާ މެދު އިދިކޮޅު އެމްޑީޕީ އާއި ޕީއެންއެފްގެ އިތުރުން ދީނީ އިލްމުވެރިން ވެސް ވަނީ ކަންބޮޑުވުން ފާޅުކޮށްފަ އެވެ. "ދިވެހިިންގެ ބިން ދިވެހިންނަށް" ހަރަކާތުގެ ބޭނުމަކީ މި ހުރިހާ ފަރާތްތަކެއް އެއްގަލަކަށް އަރުވައި ގައުމީ ފެންވަރެއްގައި މި މަސައްކަތް ހުއްޓުވުން ކަމަށް އިމްރާން ވިދާޅުވި އެވެ.
ސަރުކާރުން ބުނަނީ އީގަލް ހިލްސްއަށް ރަސްމާލެ ވިއްކާލަނީ 99 އަހަރަށް ކަމަށެވެ. ނަމަވެސް އީގަލް ހިލްސް އިން ބުނެފައި ވަނީ ސަރުކާރުން އެ ބުނާ 99 އަހަރުގެ މުއްދަތު ހަމަވުމުގެ ކުރިން ރަސްމާލޭގެ ޕްރޮޕަޓީއެއް ވިއްކާލައިފި ނަމަ ނުވަތަ ހިބައިން ދީފި ނަމަ 99 އަހަރުގެ ކުލީގެ އާ މުއްދަތެއް ފެށޭނެ ކަމަށެވެ.
ރަސްމާލެއިން ގަންނަ ޕްރޮޕަޓީތައް ތާއަބަދަށް ދެމިގެންދާނެ ކަމަށް ސަރުކާރުގެ ފަރާތުން އެ އެއްބަސްވުމުގައި ސޮއި ކުރެއްވި ހައުސިން މިނިސްޓަރު އަބްދުﷲ މުއްތަލިބު ވެސް ވިދާޅުވެފައިވެ އެވެ.
