ސިންގަޕޫރު ފުލުހުން މަޢުލޫމާތު ދޭ ގޮތުގައި، މި ސްކޭމް ހިންގާ ސައިބަރ ކުށްވެރިން ދަނީ އެޑްވާންސްޑް މެލްވެއަރ ބޭނުންކޮށްގެން ވަޓްސްއަޕް ވެބް އެކައުންޓްތަކުގެ ކޮންޓްރޯލް އަތުލައިގަންނަމުންނެވެ. އެއަށްފަހު، އެ އެކައުންޓްތަކުގެ މެސެޖިންގ ސިސްޓަމް ބޭނުންކޮށްގެން، ކުންފުނިތަކުގެ އިސްވެރިންގެ ގޮތުގައި ހެދިގެން އެކި ފަރާތްތަކަށް މެސެޖު ކުރެއެވެ.
މިގޮތަށް މެސެޖުކޮށް ސައިބަރ ކުށްވެރިން ދަނީ ކުއްލި ގޮތަކަށް ފައިސާގެ މުއާމަލާތްތައް ކުރުމަށާއި، އަވަހަށް ފައިސާ ފޮނުވައިދިނުމަށް އެދެމުންނެވެ. އިސްވެރިންގެ ނަމުގައި ފޮނުވާ މިފަދަ މެސެޖުތަކަކީ ސައްހަ މެސެޖުތަކެއް ކަމަށް ހީކޮށް، ސައިބަރ ކުށްވެރިންގެ މަޅީގައި މީހުން ޖެހުމުގެ ފުރުސަތު ބޮޑުކަމަށް ފުލުހުން ފާހަގަކުރެ އެވެ.
އެހެންކަމުން، ވަޓްސްއަޕް މެދުވެރިކޮށް ކުއްލި ގޮތަކަށް ފައިސާ ފޮނުވުމަށް އެދޭ މެސެޖެއް ލިބިއްޖެނަމަ، އެއީ ކާކުކަން އެހެން ވަސީލަތަކުން ކަށަވަރުކުރުމަށް ފުލުހުން ވަނީ އާންމުންނަށް އިރުޝާދު ދީފައެވެ. އަދި ވަޓްސްއަޕް ވެބް ބޭނުންކުރުމުގައި ސައިބަރ ސެކިއުރިޓީގެ ރައްކާތެރިކަމުގެ ފިޔަވަޅުތައް ވަރުގަދަކުރުމަށްވެސް ފުލުހުންގެ އިރުޝާދުގައިވެ އެވެ.
