ރައީސް އޮފީހުގައި މިއަދު ބޭއްވި ބައްދަލުވުމެއްގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުން އެ މަނިކުފާނު ވިދާޅުވީ، މި މަޝްރޫއަކީ ރައްޔިތުންގެ ވޯޓަކަށް ނުވަތަ ރެފަރެންޑަމަކަށް ދާންޖެހޭ ކަމެއް ނޫން ކަމަށެވެ. އަދި މިކަމާ ގުޅޭ ހުރިހާ އިންތިޒާމުތަކެއް ހަމަޖެހިގެންދާނީ ގާނޫނީ އިމުގެ ތެރެއިން ކަމަށްވެސް ފާހަގަކުރެއްވިއެވެ.
ރައީސް އިތުރަށް ވިދާޅުވީ، ގަވައިދެއްގެ ތެރެއިން މި މަޝްރޫއާ ގުޅޭ ކަންކަން ބަޔާންކުރުމުގެ ފުރުސަތު އޮތް ނަމަވެސް، އެގޮތަށް އަމަލުނުކުރައްވައި އެކަންކަން ހިމަނާފައިވަނީ ރިއަލް އެސްޓޭޓް ބިލުގައި ކަމަށެވެ. އަދި އަންނަން އޮތް ޖީލުތަކަށް ވެސް ރައްޔިތުންގެ ހައްގުތައް އެއްވެސް ކަންބޮޑުވުމެއް ނެތި ހިމާޔަތްކުރެވިފައިވާކަން އެ ގާނޫނުގެ އަށްވަނަ ބާބުން ސާފުކޮށް އެނގެން އޮންނާނެ ކަމަށްވެސް އެ މަނިކުފާނު ވިދާޅުވިއެވެ.
ރަސްމާލޭގައި އީގަލްސް ހިލްސް އިން ކުރިއަށް ގެންދިއުމަށް ނިންމާފައިވާ މަަޝްރޫއާއި ގުޅޭގޮތުން ރައްޔިތުންގެ ކަންބޮޑުވުންތަކެއް ހުރިކަމަށް ބުނެ، އިދިކޮޅު އެމްޑީޕީއިން ވަނީ، މިމަޝްރޫއު ކުރިއަށް ގެންދިއުމާއި ގުޅޭގޮތުން ރައްޔިތުންގެ ފެންނަ ނުފެންނަ ވޯޓަކަށް ދިއުމަށް ގަރާރެއް ފާސްކޮށްފައެވެ.
