މި ގެނެވުނު އިސްލާހުތަކާއެކު، އިންޑިއާއިން ދޫކުރަމުންދިޔަ ވިސާ ކެޓަގަރީތަކުގެ އަދަދު ވަނީ 13 އިން 9 އަށް ދަށްކޮށްފަ އެވެ. މިއީ އެ ގައުމަށް ދަތުރުކުރާ ފަރާތްތަކަށް ވިސާ ދޫކުރުމުގެ ނިޒާމު އިތުރަށް ތަރުތީބުކޮށް، އުސޫލުތައް ހަރުދަނާކުރުމުގެ ގޮތުން އިންޑިއާ ސަރުކާރުން ގެނެސްފައިވާ ބަދަލެކެވެ.
އަލަށް ގެނެވުނު ބަދަލުތަކުގެ ދަށުން، ކުރިން ދޫކުރަމުން އައި އާދައިގެ "ޓޫރިސްޓް ވިސާ" ގެ ނަން ވަނީ 'V-1 ވިޒިޓަރ ވިސާ' ގެ ނަމަށް ބަދަލުކޮށްފަ އެވެ. މި ވިސާގެ ދަށުން އިންޑިއާއަށް އެތެރެވޭ ފަރާތްތަކަށް 30 ދުވަހުގެ މުއްދަތަށް ގިނަ ފަހަރު މަތިން އެތެރެވޭ ގޮތަށް (މަލްޓިޕްލް އެންޓްރީ) ދަތުރުކުރުމުގެ ފުރުސަތު ލިބިގެންދާނެ އެވެ. މީގެ އިތުރުން ދަތުރުކުރާ ބޭނުމާ ގުޅޭގޮތުން އަމަލުކުރަންޖެހޭ ގަވާއިދުތައް ވަނީ ކުރިއަށްވުރެ ހަރުކަށިކޮށްފަ އެވެ.
ޚާއްޞަކޮށް، ސިއްޙީ ފަރުވާއަށާއި ވިޔަފާރި ދަތުރުތަކުގައި އިންޑިއާއަށް ދަތުރުކުރާ ފަރާތްތަކުން، އެ ދަތުރެއް ކުރާ ޚާއްޞަ ބޭނުމަށް ކަނޑައެޅިފައިވާ ގަވާއިދުތަކަށް ފުރިހަމައަށް އަމަލުކުރުން ވަނީ މަޖުބޫރުކޮށްފަ އެވެ. މިގޮތުން ބޭސްފަރުވާއަށާއި ވިޔަފާރިއަށް ދާ ފަރާތްތަކުން އެކަމަށް ޚާއްޞަ ކުރެވިފައިވާ އުސޫލުތަކާއި ގަވާއިދުތަކާ އެއްގޮތަށް ކަންކަން ފުރިހަމަކުރަންޖެހޭނެ ކަމަށް އިންޑިއާގެ ހޯމް މިނިސްޓްރީން ވަނީ ބަޔާންކޮށްފަ އެވެ.
މި ބަދަލުތަކުގެ ސަބަބުން އިންޑިއާއަށް ދަތުރުކުރާ އެކި ފަރާތްތަކުން ވިސާއަށް އެދޭއިރު ދަތުރުގެ މަގުސަދު ސާފުކޮށް ބަޔާންކޮށް، އެކަމާ ގުޅޭ އިދާރީ އުސޫލުތަކަށް އިތުރަށް ސަމާލުކަން ދޭންޖެހޭނެ އެވެ. އިންޑިއާގެ ވިސާ ނިޒާމަށް ގެނެވުނު މި ބޮޑު ބަދަލަކީ އެ ގައުމުގެ އެތެރެވުމުގެ އުސޫލުތައް ހަރުދަނާކުރުމަށް އެޅުނު މުހިންމު ފިޔަވަޅެކެވެ.
