އީރާނުގެ އަސްކަރިއްޔާއިން ނެރުނު ބަޔާނެއްގައި ބުނީ އެމެރިކާގެ ބައިވެރިންގެ މަރުކަޒުތައް ބޭނުން ކޮށްގެން އީރާނަށް އާ ހަމަލާތަކެއް ދީފި ނަމަ، އެމެރިކާ ސިފައިންނަށާއި އެ ގައުމުގެ ބައިވެރިންނަށް އީރާނުން ދޭ ރައްދު ކުރިއަށް ވުރެ މާ ވަރުގަދަވެފައި ގެއްލުން ބޮޑުވާނެ ކަމަށެވެ.
އީރާންއަށް ބިރުދެއްކުމުގެ ގޮތުން އެމެރިކާގެ އެއާކްރާފްޓް ކެރިއާ ގެ އިތުރު 3 މަނަވަރު ވަނީ މެދުއިރުމައްޗަށް އައުމުގެ މަގުމަތީގަ އެވެ. މިހާރުވެސް އީރާނުގެ އައްސޭރިފަށާ ދުރުގައި އެމެރިކާގެ އެއާކްރާފްޓް ކެރިއާގެ މަނަވަރެއް އެބައޮތެވެ.
އާ ހަނގުރާމައެއް ނުފެށުމުގެ ވައުދާ އެކު ވެރިކަމަށް ވަޑައިގެންނެވި ނަމަވެސް، މިދިޔަ ފެބްރުއަރީ މަހު އީރާނާ ދެކޮޅަށް އަސްކަރީ ފިޔަވަޅު އެޅުމަށް ނިންމެވި ނިންމެވުން ޓްރަމްޕް ވަނީ ދިފާއުކުރައްވާފަ އެވެ.
ނުވަ މަސް ދުވަހަށް ދެމިގެން ގޮސްފައިވާ މި ހަނގުރާމައާ މެދު އެމެރިކާގެ ރައްޔިތުންގެ މެދުގައި ނުރުހުން އުފެދިފައިވާއިރު، ތެލުގެ އަގު އުފުލުމާއި ދިރިއުޅުމުގެ ހަރަދުތައް ބޮޑުވުމަކީ އިންތިހާބުގެ ކެމްޕޭން ތެރޭގައި ކުރިމަތިވި މައިގަނޑު މައްސަލަތަކެވެ. ޑިމޮކްރެޓިކް ކެންޑިޑޭޓުން ވަނީ ސަރުކާރުން ހަނގުރާމަ ކުރިއަށްގެންދާ ގޮތަށް ފާޑުކިޔައި އެމެރިކާގެ އާއިލާތަކަށް މާލީ ގޮތުން ކުރިމަތިވަމުންދާ ދަތިތަކަކީ މި ހަނގުރާމައިގެ ނަތީޖާ ކަމަށް ތަކުރާރުކޮށް ބުނެފަ އެވެ.
އެމެރިކާ އާއި އިޒްރޭލުން ފެބްރުއަރީ މަހުގެ 28 ވަނަ ދުވަހު ދިން ހަމަލާތަކެއްގައި އީރާންގެ ރޫހީ ލީޑަރު އާޔަތުﷲ އަލީ ޚާމަނާއީ އަވަހާރަކޮށްލި ފަހުން، އެ ސަރަހައްދުގައި ހިނގަމުންދާ ހަނގުރާމައަށް ހުއްޓުމެއް ނާދެ އެވެ.
ހަމަލާތަކުގެ ރައްދުގައި އީރާނުން ވަނީ ސަރަހައްދުގެ އެކި ގައުމުތަކަށް މިސައިލާއި ޑްރޯން ހަމަލާތައް ފޮނުވާލައިފަ އެވެ. އަދި އީރާނުން ވާގިވެރިވާ ލުބުނާނާއި ޔަމަން އަދި އިރާގުގެ ހަނގުރާމަވެރި ޖަމާއަތްތަކުން ވެސް ވަނީ މި ހަނގުރާމައިގެ ތެރެއަށް ވަދެފަ އެވެ.