އެ މިނިސްޓްރީ އިން ބުނީ މި ވެބިނާގައި މިނިސްޓަރު އަލީ ވަހީދު ގެ އިތުރުން، ކޮމަންވެލްތުގެ ސެކްރެޓަރީ ޖެނެރަލް ރައިޓް އޮނަރަބަލް ޕެޓްރީޝިއާ ސްކޮޑްލަންޑް، މަލްޓާގެ ކުރީގެ ބޮޑުވަޒީރު ޖޯސެފް މުސްކަޓް، ނެމީބިޔާގެ ޑެޕިއުޓީ ޕްރައިމް މިނިސްޓަރު ނެޓުމްބޯ ނަންޑިންޑައިޓްވާ އަދި ބާބަޑޮސްގެ ފިނޭންސް މިނިސްޓަރު ރަޔަން ސްޓްރޯންގް ބައިވެރިވެވަޑައިގަންނަވާނެ ކަމަށެވެ. 

މި ވެބިނާ ފެށުމަށް ހަމަޖެހިފައި ވަނީ މިއަދު ރާއްޖެ ގަޑިން 18:00 ގައި އެވެ. 

މިވެބިނާ އަކީ ކޮވިޑް-19 އާއި ގުޅިގެން ކޮމަންވެލްތުން ސިލްސިލާކޮށް ބާއްވަމުން އަންނަ ވާޗުއަލް ސެމިނާ، "ދި އިކޮނޮމިކްސް އޮފް ކޮވިޑް-19" ގެ ދަށުން ބޭއްވޭ ވެބިނާ އެކެވެ. މި ވެބިނާގައި ފަތުރުވެރިކަމާއި ދަރަނި އަދި ކާރިސީ ހިރާސް އާއި ގުޅޭ ގޮތުން މަޝްވަރާކުރާނެ އެވެ.