ފީފާގެ ކައުންސިލް މެންބަރުންގެ މެދުގައި ބުރާސްފަތި ދުވަހު ނެގުނު ވޯޓު އޮސްޓްރޭލިއާ- ނިއުޒީލަންޑުން ކާމިޔާބު ކުރީ 22 ވޯޓުންނެވެ. ކޮލަމްބިއާގެ ބިޑަށް ލިބުނީ 13 ވޯޓެވެ. 2023 ވަނަ އަހަރުގެ ފީފާ، އަންހެނުންގެ ވޯލްޑްކަޕް، އޮސްޓްރޭލިއާ-ނިއުޒީލަންޑްގެ ޖޮއިންޓް ހޯސްޓިން ބިޑަށް ކާމިޔާބުވީ އެންމެ ފަހު ވަގުތު ޖަޕާނުން އެ މީހުންގެ ބިޑު އަނބުރާ ގެންދިޔުމުންނެވެ. ޖަޕާނުގެ ބިޑު އަނބުރާ ގެންދިޔައީ ޓޯކިޔޯ އޮލިމްޕިކްސް އަންނަ އަހަރަށް ފަސްކުރުމުންނެވެ.
އޮސްޓްރޭލިއާ- ނިއުޒިލަންޑުން 2023 ވަނަ އަހަރުގެ ވޯލްޑްކަޕް ބިޑް ކާމިޔާބުކުރިއިރު، 2023 ވަނަ އަހަރުގެ ވޯލްޑްކަޕް ވެގެންދާނީ 32 ޓީމާއި އެކު ކުރިއަށްދާ އަންހެނުންގެ ފުރަތަމަ ވޯލްޑްކަޕަށެވެ. މީގެ ކުރިން އަންހެން ވޯލްޑްކަޕުގައި ވާދަކުރަނީ 24 ގައުމުންނެވެ. އަންހެނުންގެ ވޯލްޑްކަޕް އެންމެ ފަހުން ހޯސްޓްކޮށްފައިވަނީ ފްރާންސުންނެވެ. 2019 ވަނަ އަހަރު އޮތް މި މުބާރާތުގެ ފައިނަލްގައި ނެދަލެންޑް ބަލިކޮށް މުބާރާތް ކާމިޔާބުކޮށްފައިވަނީ އެމެރިކާއިންނެވެ.
